Իրանի Իսլամական հեղափոխության պահապանների կորպուսը (ԻՀՊԿ) հայտարարել է, որ իր ռազմական դոկտրինը այժմ դառնում է «հարձակողական և ասիմետրիկ»։

«Նախկինում Իրանի պաշտպանական դոկտրինը եղել է զուտ պաշտպանողական. մենք հայտարարել էինք, որ մեզ վրա հարձակման դեպքում մենք կպատասխանենք»,- SNN-ին տված հարցազրույցում ասել է ԻՀՊԿ-ի ներկայացուցիչ, բրիգադի գեներալ Հոսեյն Մոհեբբին։

Մերձավոր Արևելքում լարվածության աճի ֆոնին ԻՀՊԿ-ի ներկայացուցիչը սպառնացել է «ներխուժել» ցանկացած երկիր, որը կհարձակվի Իրանի վրա։

«Հիմա մենք ասում ենք. եթե որևէ երկիր հարձակվի մեզ վրա, մենք ոչ միայն կպատասխանենք, այլև կներխուժենք նրա տարածք։ Մեր դոկտրինը դառնում է հարձակողական և ասիմետրիկ։ Մենք հակառակորդին կհարվածենք այնպես, որ նա գիտակցի մեր գործողությունների ողջ ուժը»,- զգուշացրել է իրանցի գեներալը։

Մոհեբբին նաև հայտարարել է, որ ԻՀՊԿ-ն պատրաստվում է ներկայացնել սպառազինության նոր տեսակ, որը նա անվանել է «բոլոր ռումբերի հայր», փոխանցում են իրանական լրատվամիջոցները։ «Մենք գտնվում ենք «բոլոր ռումբերի հոր» շնորհանդեսի նախապատրաստական ​​փուլում։ Սա հակառակորդի համար նոր բան է»,- ասել է Մոհեբբին։ Սպառազինության նոր տեսակի մասին, որը ենթադրաբար հայտնվել է Իրանում, նա որևէ մանրամասն չի հայտնել։