ՊԵԿ պաշտոնական կայքում հրապարակվել է Կարապետյան ընտանիքին պատկանող «Տաշիր» բարեգործական հիմնադրամի՝ 2025 թվականի գործունեության մասին հաշվետվությունը։ Civic.am-ի ուսումնասիրությունը ցույց տվեց, որ հունիսի 7-ի ընտրություններին նախորդած տարում սույն հիմնադրամը ահռելի միջոցներ է ծախսել տարատեսակ ծրագրերի ուղղությամբ։ Մասնավորապես հիմնադրամի ֆինանսական օգնության «առյուծի բաժինը» ուղղվել է (որպես «ֆինանսական օգնություն») նախորդ տարի ստեղծված «Մեր ձևով  ազգային արժեքների պահպանության» ՀԿ-ին՝  1 միլիարդ 16 միլիոն 527 հազար 735 դրամ։ Թե ինչ նպատակների վրա է ծախսել ՀԿ-ն այս ահռելի գումարը՝ հայտնի չէ։  Նշենք, որ սույն ՀԿ-ի հիմնադիրն ու գործադիր ղեկավարը այժմ փողերի լվացման և հավաքներին մասնակցելու նպատակով քաղաքացիներին նյութապես շահագրգռելու համար քրեական հետապնդման ենթարկվող, կալանքի տակ գտնվող Ալիկ Ալեքսանյանն է։ 

Ֆիզիկական անձանց (կարիքավոր, հաշմանդամ, բուժման նպատակով), որպես ֆինանսական օգնություն, հիմնադրամը հատկացրել է 240 միլիոն 982 հազար 354 դրամ։ Իրավաբանական անձանց էլ  հատկացրել է 241 միլիոն 805 հազար 83 դրամ։ Ինչպես ամեն տարի՝ այս տարի ևս հիմնադրամը 76 միլիոն 300 հազար դրամ   ֆինանսական օգնություն է հատկացրել Մայր Աթոռ Սուրբ Էջմիածնին։ Նախորդ տարի Գյումրիում քաղաքի տոնի առթիվ կազմակերպված միջոցառման համար էլ 42 միլիոն 44 հազար 373  դրամ է ծախսվել։ Հիմնադրամը ահռելի միջոցներ է ծախսել նաև այլ ծրագրեր իրականացնելու նպատակով՝ Սամվել և Կարեն Կարապետյանների հայրենի Լեռնահովիտի փողոցների բարեկարգում, աջակցություն ԼՂ-ից տեղահանվածներին։      

Ֆինանսական տարում  օգտագործված միջոցների ընդհանուր չափը կազմել է 2 միլիարդ 841 միլիոն 378 հազար դրամ, որից 2 միլիարդ 771 միլիոն 76 հազար 770 դրամը՝ կանոնադրական նպատակների իրականացման համար։   

Հիմնադրամի կառավարիչը Աշոտ Վարոսյանն է։