Ուկրաինայի նախագահ Վոլոդիմիր Զելենսկին հայտնել է, որ հրամանագիր է ստորագրել զինված ուժերի կազմում «Ռուսաստանի վրա հեռահար ազդեցության հատուկ հրամանատարություն» ստեղծելու մասին: Այս մասին նա ասել է իր երեկոյան ուղերձում։
«Այս հրամանատարությունը պետք է կենտրոնացնի առկա բոլոր ռեսուրսները, որպեսզի ավելի զգալիորեն նվազեցնի Ռուսաստանի ռազմական ներուժը»,- ասել է Զելենսկին։
Նա չի հայտնել, թե ով կգլխավորի նորաստեղծ հրամանատարությունը՝ նշելով միայն, որ այն ղեկավարելու է «առավելագույն փորձ ունեցող» անձը։
Զելենսկին նաև անդրադարձել է Ռուսաստանում խորացող վառելիքային ճգնաժամին՝ նշելով, որ այն Ուկրաինայի հեռահար գործողությունների արդյունք է և պատասխան՝ ՌԴ նախագահ Վլադիմիր Պուտինի՝ պատերազմը դադարեցնելու պատրաստակամության բացակայությանը։
«Մենք ներկայացրել ենք առաջարկներ՝ խաղաղությունն ավելի մոտեցնելու համար։ Աջակցություն ունենք ոչ միայն մեր միջազգային գործընկերների, այլև Պուտինի շրջապատում։ Այնտեղ հասկանում են, թե ինչ է տեղի ունենում, և որ խաղաղությանն այլընտրանք չկա»,- ասել է Ուկրաինայի նախագահը։
Վերջին շաբաթներին Ռուսաստանում սրվել է վառելիքային ճգնաժամը, որը, ըստ հրապարակումների, պայմանավորված է նավթավերամշակման գործարաններին ուկրաինական հարվածներով։
Միևնույն ժամանակ, ԱՄՆ նախագահ Դոնալդ Թրամփը, ՆԱՏՕ-ի գագաթնաժողովի շրջանակում Զելենսկու հետ հանդիպման ընթացքում, հայտարարել է, որ Ուկրաինայի կողմից Ռուսաստանի էներգետիկ ենթակառուցվածքների դեմ հարվածների ուժեղացումը «էսկալացիա է, սակայն այդ էսկալացիան կարող է նպաստել պատերազմի ավարտին»։
Իր հերթին, ՌԴ նախագահ Վլադիմիր Պուտինը հայտարարել է, որ Ուկրաինան նման հարվածներով փորձում է վնաս հասցնել Ռուսաստանի տնտեսությանը և «հասարակությունում նյարդային մթնոլորտ ստեղծել»։
