Իրաքի
արևմուտքում կործանվել է ամերիկյան KC-135 լցավորող ինքնաթիռը։ Այս մասին հայտնել
է ԱՄՆ ԶՈՒ Կենտրոնական հրամանատարությունը (CENTCOM): Զինվորականների
տվյալներով՝ միջադեպը տեղի է ունեցել «բարեկամական օդային տարածքում»՝ Իրանի դեմ
«Էպիկական զայրույթ» գործողության ժամանակ։
«Միջադեպին
մասնակցել են երկու ինքնաթիռ։ Մեկը կործանվել է Իրաքի արևմուտքում, իսկ մյուսը բարեհաջող
վայրէջք է կատարել։ Սա թշնամական կամ բարեկամական կրակի պատճառով չի եղել»,-
ասվում է ԱՄՆ հրամանատարության հաղորդագրության մեջ։
Թե
անձնակազմի որքան անդամ է եղել ինքնաթիռում, ինչպես նաև նրանց վիճակի մասին հրամանատարությունը
չի հայտնել:
«Իրաքում
իսլամական դիմադրություն» իրանամետ խմբավորումը հայտարարել է, որ ինքն է խոցել
ամերիկյան KC-135 լցավորող ինքնաթիռը։ Խմբավորման հաղորդագրության մեջ, որը
մեջբերել է Reuters-ը, ասվում է, որ ինքնաթիռը խոցվել է «ի պաշտպանություն մեր
երկրի ինքնիշխանության և օդային տարածքի»։
Reuters-ի
տվյալներով՝ «միջադեպին» մասնակցած երկրորդ ինքնաթիռը նույնպես KC-135 էր։
Գործակալությունը հաղորդում է, որ կործանված ինքնաթիռում եղել է «մինչև վեց
զինծառայող»։
