Զելենսկին ժամանել է Վաշինգտոն, որտեղ այսօր կհանդիպի Թրամփի հետ, իսկ վաղը կլինի համատեղ հանդիպում եվրոպացի առաջնորդների հետ։ Այս մասին Ուկրաինայի առաջնորդը գրել է իր Telegram ալիքում։

«Ես արդեն ժամանել եմ Վաշինգտոն։ Վաղը հանդիպում կլինի նախագահ Թրամփի հետ։ Վաղը կխոսենք նաև եվրոպացի առաջնորդների հետ։ Շնորհակալ եմ ԱՄՆ նախագահին հրավերի համար»,- նշել է նա։

Ուկրաինայի նախագահը ավելացրել է. «Մենք բոլորս հավասարապես ցանկանում ենք արագ և հուսալիորեն ավարտել այս պատերազմը։ Եվ խաղաղությունը պետք է լինի երկարատև։ Ոչ այնպես, ինչպես տարիներ առաջ էր, երբ Ուկրաինան ստիպված էր հրաժարվել Ղրիմից և մեր Արևելքի մի մասից՝ Դոնբասի մի մասից, իսկ Պուտինը դա օգտագործեց պարզապես որպես նոր հարձակման պլացդարմ։ Կամ երբ Ուկրաինային 1994 թվականին տրվեցին «անվտանգության երաշխիքներ», և դրանք չգործեցին»։

«Իհարկե, Ղրիմը չարժեր հանձնել այն ժամանակ, ինչպես 2022 թվականից հետո ուկրաինացիները չհանձնեցին Կիևը, Օդեսան, Խարկովը։ Ուկրաինացիները պայքարում են իրենց հողի, իրենց անկախության համար։ Հիմա մեր զինվորները հաջողություններ ունեն Դոնեցկի և Սումիի մարզերում։ Վստահ եմ, որ մենք կպաշտպանենք Ուկրաինան, իրականում կապահովենք անվտանգությունը, և մեր ժողովուրդը միշտ շնորհակալ կլինի նախագահ Թրամփին, Ամերիկայում բոլորին, յուրաքանչյուր գործընկերոջը՝ իրենց աջակցության և անգնահատելի օգնության համար»,- հավելել է Զելենսկին։

Նրա խոսքով՝ Ռուսաստանը պետք է ավարտի այս պատերազմը, որը ինքն էլ սկսել է. «Եվ ես հույս ունեմ, որ Ամերիկայի և մեր եվրոպացի ընկերների հետ մեր ընդհանուր ուժը կստիպի Ռուսաստանին հասնել իրական խաղաղության։ Շնորհակալություն»։