Եվրամիության առաջնորդները հայտարարություն են տարածել Ուկրաինայի հարցով, որում մասնավորապես նշել են, որ ողջունում են ԱՄՆ նախագահ Դոնալդ Թրամփի ջանքերը՝ ուղղված Ուկրաինայի դեմ Ռուսաստանի ագրեսիվ պատերազմի դադարեցմանը և Ուկրաինայի համար անվտանգության ու արդարացի և տևական խաղաղության ապահովմանը:

«Արդարացի և երկարատև խաղաղությունը, որը ապահովում է կայունություն և անվտանգություն, պետք է հարգի միջազգային իրավունքը, ներառյալ անկախության, ինքնիշխանության, տարածքային ամբողջականության սկզբունքները և այն, որ միջազգային սահմանները չեն կարող փոխվել ուժով։

Ուկրաինայի ժողովուրդը պետք է ունենա իր ապագան որոշելու ազատություն։ Ուկրաինայում խաղաղության տանող ուղին չի կարող որոշվել առանց Ուկրաինայի մասնակցության։ Կառուցողական բանակցությունները կարող են տեղի ունենալ միայն հրադադարի կամ ռազմական գործողությունների նվազեցման պայմաններում»,- ասվում է հայտարարության մեջ։

Ռուսաստանի ագրեսիվ պատերազմը Ուկրաինայի դեմ ավելի լայն հետևանքներ ունի եվրոպական և միջազգային անվտանգության համար, ասվում է ԵՄ առաջնորդների հայտարարության մեջ. «Մենք կիսում ենք այն համոզմունքը, որ դիվանագիտական լուծումը պետք է պաշտպանի Ուկրաինայի և Եվրոպայի կենսական անվտանգության շահերը։

Եվրամիությունը, Միացյալ Նահանգների և այլ համախոհ գործընկերների համակարգմամբ, կշարունակի Ուկրաինային տրամադրել քաղաքական, ֆինանսական, տնտեսական, մարդասիրական, ռազմական և դիվանագիտական աջակցություն ինքնապաշտպանության իր անբաժանելի իրավունքի իրականացման գործընթացում։ Այն նաև կշարունակի աջակցել և կիրառել սահմանափակող միջոցներ Ռուսաստանի Դաշնության դեմ»։


Եվրոպական Միությունն ընդգծել է սեփական ճակատագիրը ընտրելու Ուկրաինայի անքակտելի իրավունքը և Ուկրաինային ԵՄ անդամակցության ճանապարհին աջակցությունը։