Ադրբեջանի նախագահ Իլհամ Ալիևը չի ընդունի Բելգիայի արտգործնախարարին նրա հայամետ դիրքորոշման պատճառով։
«Բելգիայի արտգործնախարար Հաջա Լաբիբը Հայաստան կատարած այցի ժամանակ հնչեցրել է հայանպաստ հայտարարություններ, որոնք հեռու են իրականությունից և չեն համապատասխանում տարածաշրջանում իրավիճակին»,- հայտնում է ԱՊԱ-ն։
Բելգիայի ԱԳՆ ղեկավարը տարածաշրջան այցի շրջանակներում այսօր կժամանի Ադրբեջան։
Ավանդույթի համաձայն՝ նախագահ Իլհամ Ալիևն ընդունում է Ադրբեջան այցելած օտարերկրյա պետությունների արտգործնախարարներին, մտքեր փոխանակում երկկողմ հարաբերությունների, տարածաշրջանի և աշխարհի արդի հարցերի շուրջ։
ԱՊԱ-ին հասած տեղեկությունների համաձայն՝ նախագահ Իլհամ Ալիևը չի ընդունի Բելգիայի արտգործնախարարին հայանպաստ դիրքորոշման և Հայաստան կատարած այցի ընթացքում արված «անհիմն» հայտարարությունների պատճառով։
Նշենք, որ այսօր նախատեսված է Բելգիայի ԱԳՆ ղեկավարի հանդիպումը Ադրբեջանի արտաքին գործերի նախարար Ջեյհուն Բայրամովի հետ։
