Եվրախորհրդարանի՝ միջազգային հարաբերությունների հարցերով կոմիտեն դիմել է Անկարային՝ կոչ անելով ճանաչել Հայոց ցեղասպանությունը։ Այս մասին ասված է ԵՄ-ում հայկական պատվիրակության 2022 թվականի Թուրքիայի հարցով կոմիտեի զեկույցում։ Կոմիտեն աջակցում է Հայաստանի և Թուրքիայի միջև հարաբերությունների կարգավորմանը՝ ելնելով «հաշտեցման, տարածաշրջանային կայունության և անվտանգության» շահերից։
Այն կոչ է անում շուտափույթ իրականացնել հատուկ ներկայացուցիչների ձեռք բերած պայմանավորվածությունները, ինչպիսիք են օդային տարածքի և երկու երկրների միջև սահմանի բացումը։
Զեկույցը ողջունում է մինչ այժմ ձեռք բերված առաջընթացը և գոհունակությամբ նշում է Հայաստանի վարչապետի ներկայությունը Թուրքիայի նախագահի երդմնակալությանը։
«Կոմիտեն Թուրքիային կոչ է անում ճանաչել Հայոց ցեղասպանությունը՝ թուրք և հայ ժողովուրդների միջև իրական հաշտեցման ուղի հարթելու համար»,- ասվում է զեկույցում։
Փաստաթուղթը նաև կոչ է անում Թուրքիային ամբողջությամբ կատարել հայկական մշակութային ժառանգությունը պաշտպանելու իր պարտավորությունները։
