Փետրվարի 13-ին Փարիզի քաղաքային խորհուրդը միաձայն ընդունել է «Ադրբեջանում կալանավորված Լեռնային Ղարաբաղի նախկին առաջնորդների տագնապալի վիճակի մասին» կոչ։

Իր կոչում, հղում անելով Լեռնային Ղարաբաղի նախկին առաջնորդների կալանքի հանգամանքներին, Ադրբեջանում նրանց պահման պայմաններին և նրանց առաջադրված շինծու մեղադրանքներին, Փարիզի քաղաքային խորհուրդը դատապարտում է Լեռնային Ղարաբաղի նախկին առաջնորդների անօրինական կալանքը ու կեղծ դատավարությունները և պահանջում ազատ արձակել նրանց։

Կոչը Փարիզի քաղաքային խորհրդում քվեարկության է դրել փոխքաղաքապետ Առնո Նգատչը։ Փարիզի քաղաքապետի հրավերով նիստին ներկա է եղել նաև Ֆրանսիայում Հայաստանի դեսպան Արման Խաչատրյանը։