ՀՀ կառավարության վաղվա՝ հուլիսի 25-ի նիստի օրակարգային հարցերից է  Հայաստանի Հանրապետության և Եվրասիական զարգացման բանկի միջև «Կայունացման և զարգացման եվրասիական հիմնադրամի միջոցներից «Քաջարանի թունելի շինարարություն» ծրագրի ֆինանսավորման համար ներդրումային վարկի տրամադրման մասին» համաձայնագրի ստորագրման առաջարկությանը հավանություն տալու մասին հարցը։ ՏԿԵ նախարարությունն առաջարկում է հավանություն տալ համաձայնագրի ստորագրմանը։

Civic.am-ը նախագծին կից հիմնավորումից տեղեկացավ, որ  ՀՀ-ի և Եվրասիական զարգացման բանկի  միջև  նախատեսվում է կնքել վարկային համաձայնագիր, որով Կայունացման և զարգացման եվրասիական հիմնադրամի միջոցներից կտրամադրվի 200 մլն ԱՄՆ դոլարի չափով ներդրումային վարկ Քաջարանի թունելի շինարարությունը   ֆինանսավորելու համար։ Ծրագրի նպատակն է «Հյուսիս-Հարավ» ավտոճանապարհային միջանցքի հատվածում տարանցիկ փոխադրումների ներուժի բարձրացումն  ու վթարայնության նվազեցումը։ Ծրագրի մանրամասն նախագծով նախատեսվում է իրականացնել Քաջարանի թունելի (երկարությունը՝ շուրջ 7.0 կմ) կառուցման և գոյություն ունեցող Մ2 Երևան-Երասխ-Գորիս-Մեղրի-Իրանի սահման շուրջ 4 կմ (Քաջարանի թունելի մուտք-Սիսիան-Քաջարան նախատեսվող նոր ճանապարհահատվածի խաչմերուկ) երկարությամբ հատվածի վերակառուցման աշխատանքները: Մանրամասն նախագիծը պատրաստ է և անցել է պարզ ու պետական համալիր փորձաքննությունը։

Ծրագրի կարիքների համար նախատեսվում է օտարել շուրջ 160 հողամաս:

Նախատեսված շինարարական աշխատանքների իրականացման հաշվարկված ժամկետը կազմելու է շուրջ 6 տարի: Նախատեսված շինարարական աշխատանքների նախահաշվային արժեքը (ներառյալ ԱԱՀ-ն) կազմում է 144,6 մլրդ ՀՀ դրամ (կամ շուրջ 369 մլն ԱՄՆ դոլար)։ Հաշվի առնելով այն հանգամանքը, որ Քաջարանի շուրջ 7 կմ երկարությամբ թունելի կառուցման և մոտեցող ճանապարհների (շուրջ 4 կմ ընդհանուր երկարությամբ) մանրամասն նախագծման աշխատանքները իրականացվել են Հիմնադրամի և ՀՀ կառավարության միջև 2015 թվականի ապրիլի 15-ին ստորագրված վարկային համաձայնագրի շրջանակներում՝ ՀՀ տարածքային կառավարման և ենթակառուցվածքների նախարարությունը նպատակահարմար է համարում սույն ներդրումային վարկի տրամադրման մասին համաձայնագրի ստորագրումը:

Համաձայնագրով Ծրագրի իրականացման ընդհանուր ղեկավարման համար պատասխանատու պետական մարմինը Հայաստանի Հանրապետության տարածքային կառավարման և ենթակառուցվածքների նախարարությունն է։