Գերմանիայի ԱԳՆ-ն այսօր՝ հուլիսի 4-ին, հայտարարել է, որ կանչել է Թուրքիայի դեսպանին։ «Որպես Եվրո 2024-ի տանտերեր՝ մենք ցանկանում ենք, որ սպորտը միավորի»,- X սոցիալական ցանցում ասվում է նախարարության հաղորդագրության մեջ:

Դեսպանի կոչը կապված է այն բանի հետ, որ թուրք ֆուտբոլիստ Մերիհ Դեմիրալը մատներով նմանակել է գայլի գլխի ձևը այն բանից հետո, երբ հուլիսի 2-ին ֆուտբոլի Եվրոպայի առաջնությանը Ավստրիայի դեմ խաղում գոլ է խփել։

Ցուցադրված ժեստը կապված է «Գորշ գայլերի»՝ Թուրքիայի Ազգայնական շարժում կուսակցության ծայրահեղ ազգայնական երիտասարդական մասնաճյուղի հետ: Ժեստն արգելված է Ավստրիայում, «Գորշ գայլեր» խումբն արգելված է աշխարհի տարբեր երկրներում, օրինակ՝ Ֆրանսիայում, իսկ Ռուսաստանի միջազգային գործերի խորհուրդը կազմակերպությունը համարում է ծայրահեղական։ Գերմանիայում «գայլի ողջույնն» արգելված չէ, միաժամանակ իրավապահ մարմինները հետևում են խմբին։