Սերբիայի հակահետախուզությունը հայտարարել է, որ Ուկրաինան կապ չունի «Թուրքական հոսք» գազատարը պայթեցնելու փորձի հետ՝ հերքելով Բուդապեշտի և Մոսկվայի պնդումները։

Սերբիայի ռազմական անվտանգության գործակալության (VBA) ղեկավար Ջուրո Յովանիչի խոսքով՝ դիվերսիան նախապատրաստել է ռազմական պատրաստվածություն ունեցող միգրանտների խմբի մի անդամ, ով այժմ հետախուզման մեջ է։ Նա ընդգծել է, որ «ճիշտ չէ, թե ուկրաինացիներն են փորձել կազմակերպել այս գործողությունը», իսկ պայթուցիկի վրայի մակնշումը մատնանշում է դրա ամերիկյան արտադրությունը։

Ավելի վաղ Սերբիայի և Հունգարիայի սահմանի մոտ հայտնաբերվել էին պայթուցիկով լցված պայուսակներ։ Հունգարիայի վարչապետ Վիկտոր Օրբանը հայտարարել էր սաբոտաժի փորձի մասին և ուժեղացրել գազատարի պաշտպանությունը, իսկ Դմիտրի Պեսկովը հնարավոր էր համարել Կիևի առնչությունը։