Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալասը մասնավոր զրույցներում Եվրոհանձնաժողովի նախագահ Ուրսուլա ֆոն դեր Լյայենին անվանում է «դիկտատոր», սակայն խոստովանում է, որ «քիչ բան կարող է անել դրա դեմ»։ Այս մասին հայտնում է Politico-ն։
«Կալասը մասնավոր կարգով գանգատվում է, որ նա (ֆոն դեր Լյայենը) դիկտատոր է, բայց ինքը քիչ բան կարող է փոխել», — հրատարակությանը հայտնել է բարձրաստիճան մի պաշտոնյա։
Ըստ այլ պաշտոնյաների՝ եթե ֆոն դեր Լյայենի և Կալասի նախորդի՝ Ժոզեպ Բորելի հարաբերությունները շատ վատ էին, ապա նոր ղեկավարի դեպքում իրավիճակն էլ ավելի է վատթարացել։
Երկու կանանց միջև լարվածությունը վաղեմի պատմություն ունի։ Politico-ն առանձնացնում է մի քանի հիմնական կետեր.
Ազդեցության կորուստ. Անցյալ տարի Կալասի գլխավորած Եվրոպական արտաքին գործողությունների ծառայությունը (ԵԱԳԾ) կորցրեց իր ազդեցության մի մասը, քանի որ Եվրոհանձնաժողովը ստեղծեց սեփական Գլխավոր տնօրինությունը՝ Մերձավոր Արևելքի, Հյուսիսային Աֆրիկայի և Պարսից ծոցի հարցերով։
Հաստիքների կրճատում. Հանձնաժողովն ակտիվորեն աշխատում է Կալասի գերատեսչության աշխատակազմը կրճատելու պլանների վրա։
Լիազորությունների հատում. Չնայած Եվրոպական արտաքին գործողությունների ծառայությունը ԵՄ առանձին արտաքին քաղաքական մարմին է, միջազգային հարաբերությունների հարցերը մտնում են նաև Եվրոհանձնաժողովի իրավասության մեջ։ Այս «խաչաձևումը» պարբերաբար հանգեցնում է կառուցվածքային հակամարտությունների։
Լարվածության ևս մեկ առիթ դարձավ Կալասի փորձը՝ որպես իր տեղակալ նշանակել Մարտին Զելմայերին։ Վերջինս ֆոն դեր Լյայենի նախորդի՝ Ժան-Կլոդ Յունկերի օրոք ազդեցիկ պաշտոնյա էր, սակայն ներկայիս նախագահի օրոք «շնորհազրկվել էր» և ուղարկվել Վատիկան՝ որպես ԵՄ դեսպան։ Կալասի այս առաջարկը նույնպես տապալվեց ԵՄ ղեկավարության կողմից։
