Իսրայելի վարչապետ Բենյամին Նեթանյահուն ԱՄՆ նախագահ Դոնալդ Թրամփին հայտնել է, որ Թել Ավիվը նոր հարված կհասցնի Իրանին, եթե Թեհրանը կրկին փորձի ակտիվացնել իր միջուկային ծրագիրը։
Այս մասին հաղորդում է The Wall Street Journal-ը՝ հղում անելով Սպիտակ տան աղբյուրներին։
Հուլիսի 8-ին կայացած պաշտոնական հանդիպման ժամանակ Թրամփը նշել է, որ հույս ունի խուսափել Իրանին ամերիկյան հարվածներից. «Չեմ կարող պատկերացնել, որ ես կցանկանայի դա անել»։ Սակայն փակ խոսակցության ընթացքում Նեթանյահուն զգուշացրել է, որ Իսրայելը անտարբեր չի մնա, եթե Իրանը կրկին սկսի միջուկային զենք ստեղծելու ճանապարհը։ Թրամփն ի պատասխան նախապատվություն է տվել դիվանագիտական կարգավորմանը, սակայն չի առարկել Իսրայելի դիրքորոշմանը։
Իսրայելի գործողությունն Իրանի դեմ սկսվել է հունիսի 13-ի գիշերը և դարձել ՑԱԽԱԼ-ի ամենամեծ հարձակումը իրանական օբյեկտների վրա։ Գործողության թիրախում էին հետազոտական կենտրոնները, սպառազինության պահեստները և Իսլամական հեղափոխության պահապանների կորպուսի շտաբները, առաջին հերթին միջուկային ծրագրի հետ կապված օբյեկտները։
