Ուկրաինական անօդաչուների հարձակումը ռուսական ավիաբազաների վրա, որն անցկացվել է «Սարդոստայն» գործողության շրջանակներում, «զայրույթ և տագնապ» է առաջացրել Կրեմլում՝ առաջնագծից հեռու գտնվող ավիացիոն բազաների անսպասելի խոցելիության պատճառով, գրում է Bloomberg-ը՝ հղում անելով Մոսկվայի աղբյուրներին:

Ուկրաինան հայտարարել է, որ «Սարդոստայն» գործողության արդյունքում վնասել է 41 ինքնաթիռ: Bloomberg-ի աղբյուրը գնահատում է, որ վնասված ինքնաթիռների թիվը մոտ 10-ն է: Միևնույն ժամանակ, պարբերականի զրուցակիցները նշում են, որ Ուկրաինայի վրա հարձակումների համար անհրաժեշտ է ընդամենը մի քանի ռմբակոծիչ, ինչը նշանակում է, որ հարվածների տեմպը չի դանդաղի:

The New York Times-ը, հղում անելով ամերիկացի և եվրոպացի անվտանգության ուժերի ներկայացուցիչներին, գրում է, որ վնասի գնահատականները դեռևս ստացվում են, սակայն պարբերականի աղբյուրների գնահատականներով՝ մոտ 20 ինքնաթիռ կարող էր լուրջ վնաս կրել, այդ թվում՝ վեց Տու-95 և չորս Տու-22Մ ռազմավարական ռմբակոծիչներ, ինչպես նաև մեկ A-50 ռադիոլոկացիոն հայտնաբերման և կառավարման ինքնաթիռ («թռչող հետախույզ»):

Եվրոպացի դիվանագետների խոսքով՝  ուկրաինական կողմի գործողությունը հաջող էր Ուկրաինայում մարտական ​​ոգին բարձրացնելու հարցում։ ԱՄՆ պաշտոնյան ասում է, որ նախագահ Դոնալդ Թրամփի վարչակազմը չի տեղեկացվել հարձակումից առաջ. այս մասին ավելի վաղ հայտնել են այլ պարբերականներ։

Ամերիկացի պաշտոնյաները, ինչպես գրում է NYT-ը, Ռուսաստանից «նշանակալի պատասխան» են սպասում ուկրաինական գործողությանը: Ամերիկյան հետախուզությունը դեռևս չի պարզել, թե որ օբյեկտներին այն կուղղվի, սակայն պաշտոնյաները ենթադրում են, որ Մոսկվան կարող է վերսկսել քաղաքացիական ենթակառուցվածքների վրա անօդաչուների հարվածները, վնասել Ուկրաինայի էլեկտրահամակարգը կամ միջին հեռահարության բալիստիկ հրթիռների նոր ալիքներ արձակել Ուկրաինայի վրա: