Շուրջ երկու ամիս է, ինչ պաշտոնական տեղեկություն չկա Ուկրաինայում ՌԴ ԶՈՒ միացյալ խմբի նախկին հրամանատար, բանակի գեներալ Սերգեյ Սուրովիկինի գտնվելու վայրի մասին։ Նա անհետացել է անմիջապես այն բանից հետո, երբ «Վագներ»  ստորաբաժանման զորքերը Ռուսաստանում ապստամբության փորձ կատարեցին: Ռուս գեներալ-գնդապետ Վալերի Մարչենկովը, ով Սուրովիկինի նախկին հրամանատարն է,  չի բացահայտել, թե ներկայումս ինչ առաջադրանքներ է կատարում Սուրովիկինը, սակայն ընդգծել է, որ ՌԴ Զինված ուժերը սպասում են նրա վերադարձին։ Հունիսի 24-ին հրապարակվել էր  Սերգեյ Սուրովիկինի տեսաուղերձը, որում նա «Վագներ»-ի մարտիկներին կոչ էր անում դադարեցնել երթը դեպի Մոսկվա։  Դրանից հետո նրա  գտնվելու վայրը հայտնի չէ։

The New York Times-ը գրել է, որ Սուրովիկինը գիտեր մոտալուտ ապստամբության մասին, և  չնայած դրա դատապարտմանը, ինքը  օգնել է հեղաշրջման կազմակերպիչներին։ 

Այս ընթացքում բազմաթիվ վարկածներ են հայտնվել, թե որտեղ կարող էր անհետանալ Սուրովիկինը։ Financial Times-ը (FT)-ի աղբյուրների համաձայն՝ գեներալը կալանավորվել է ՌԴ իշխանությունների հրամանով։

Իր հերթին, Պետդումայի պաշտպանության կոմիտեի ղեկավար Անդրեյ Կարտապոլովը, պատասխանելով Սուրովիկինի գտնվելու վայրի մասին հարցին, ասել է, որ նա արձակուրդում է և «դեռ հասանելի չէ»։ Այլ մանրամասներ պատգամավորը չի հայտնել։