Ֆրանսիական ուլտրաաջ «Ազգային միավորում»-ից Եվրախորհրդարանի նախկին
պատգամավոր Բրունո Գոլնիշը, որը կուսակցության առաջնորդ Մարին Լը Պենի հետ
դատապարտվել է ԵՄ միջոցների յուրացման համար, ֆրանսիական դատարանի վճիռը համեմատել
է Հիսուս Քրիստոսի խաչելության հետ, գրում է Politico-ն։
«Հիսուս Քրիստոսը նույնպես մեղավոր ճանաչվեց, իսկ նա անմեղ էր», - ասել է
Գոլնիշը ռադիոհարցազրույցում՝ մեկնաբանելով դատարանի վճիռը։ «Ես Մարին Լը Պենին
չեմ համեմատում Հիսուս Քրիստոսի հետ, բայց նա անմեղ է, ինչպես և ես»,- հավելել է
նա։
Հիշեցնենք, որ Գոլնիշը երկուշաբթի օրը Լը Պենի հետ մեղավոր է ճանաչվել
Եվրախորհրդարանի կողմից հատկացված միջոցները յուրացնելու համար։ Նա դատապարտվել է
երեք տարվա ազատազրկման, որոնցից երկուսը՝ պայմանական, 50.000 եվրո
տուգանքի և պետական պաշտոններում առաջադրվելու արգելքի՝ հաջորդ հինգ տարիների
ընթացքում:
