Ուկրաինան դեռևս պատրաստ է համաձայնագիր ստորագրել ԱՄՆ-ի հետ օգտակար հանածոների վերաբերյալ և կառուցողական երկխոսություն վարել Վաշինգտոնի հետ։ Այս մասին հայտարարել է Ուկրաինայի նախագահ Վլադիմիր Զելենսկին Լոնդոնում եվրոպական գագաթնաժողովից հետո BBC-ի լրագրողներին տված հարցազրույցում։

Մեկնաբանելով Միացյալ Նահանգների հետ հարաբերությունները՝ Զելենսկին ընդգծել է. «Ես ցանկանում եմ, որ Ուկրաինայի դիրքորոշումը լսելի լինի»։ Կիևը ցանկանում է, որ իր գործընկերները հիշեն, թե ով է իրական ագրեսորը Ուկրաինայի և Ռուսաստանի միջև պատերազմում, ընդգծել է Ուկրաինայի ղեկավարը։

Վլադիմիր Զելենսկու խոսքով՝ այն «մարտական տոնից», որով տեղի է ունեցել նրա հանդիպումը Վաշինգտոնում ամերիկյան ղեկավարության հետ, չեն շահել ոչ ԱՄՆ-ն, ոչ Ուկրաինան որպես գործընկերներ, փոխարենը վեճը ձեռնտու էր Ռուսաստանի նախագահ Վլադիմիր Պուտինին։

Զելենսկին չի պատրաստվում նաև ափսոսանք հայտնել, թե ինչպես է վարվել ԱՄՆ նախագահ Դոնալդ Թրամփի հետ հանդիպման ընթացքում։ Զելենսկին հավելել է, որ ԱՄՆ-ի և Ուկրաինայի միջև շփումները շարունակվել են նաև փետրվարի 28-ից հետո, բայց «ոչ իր մակարդակով»։

Չնայած Օվալաձև կաբինետում տեղի ունեցած դեպքերին՝ Զելենսկին պատրաստ է վերադառնալ Սպիտակ տուն, եթե նրան հրավիրեն։ Սակայն տարածքներ զիջել Պուտինին հանքանյութերի մասին համաձայնագրի շրջանակներում, ինչպես առաջարկել են Թրամփի վարչակազմի պաշտոնյաները, ուկրաինացի առաջնորդը պատրաստ չէ, փոխանցում է BBC-ն։

Ուկրաինայի առաջնորդը նաև մեկնաբանել է ամերիկացի հանրապետական ​​սենատոր Լինդսի Գրեհեմի խոսքերն այն մասին, որ Զելենսկին պետք է «կամ փոխի իրեն, կամ հրաժարական տա և ուղարկի որևէ այլ մեկի», ում հետ ԱՄՆ-ը կարող է գործ ունենալ։ «Ինձ կարող են փոխարինել ՆԱՏՕ-ով»: Ուկրաինայի՝ ՆԱՏՕ-ին անդամակցությունը կնշանակի, որ Զելենսկին կատարել է իր առաքելությունը, հայտնել է Ուկրաինայի նախագահը Sky News-ի լրագրողներին։

Հարցին, թե ինչ է մտածում Լոնդոնում կայացած եվրոպացի առաջնորդների գագաթնաժողովի արդյունքների մասին, Զելենսկին հայտարարել է, որ Ուկրաինայի անվտանգության լավագույն երաշխիքը կլինի ուժեղ ուկրաինական բանակը։ Ուկրաինայի ձախողումն իր հերթին կլինի Եվրոպայի և ԱՄՆ-ի ձախողումը, այլ ոչ միայն Պուտինի հաղթանակը, ընդգծել է Զելենսկին։