Ֆրանսիայի նախագահ Էմանուել Մակրոնը համոզված է, որ Եվրամիությունից ապրանքների վրա ԱՄՆ մաքսատուրքերի սահմանումը կարող է վնասել ամերիկյան տնտեսությանը` առաջացնելով ինֆլյացիայի աճ։ CNN-ին տված հարցազրույցում Մակրոնը Վաշինգտոնին կոչ է արել ԵՄ-ի հետ առևտրային պատերազմ սկսելու փոխարեն կենտրոնանալ Չինաստանին դիմակայելու, Մերձավոր Արևելքի ճգնաժամի և Ուկրաինայում պատերազմի վրա։
«Եվրոպան ձեր դաշնակիցն է, և եթե ցանկանում եք, որ Եվրոպան ավելի շատ զբաղված
լինի ներդրումներով և պաշտպանության ու անվտանգության հարցերով, եթե զարգացման
հույս ունեք, որը, կարծում եմ, բխում է Միացյալ Նահանգների շահերից, չպետք է
վնասեք եվրոպական տնտեսությանը՝ սպառնալով
նրան մաքսատուրքերով»,- ընդգծել է Ֆրանսիայի նախագահը։
