Մեծ Բրիտանիայի վարչապետ Քիր Սթարմերը և Ֆրանսիայի նախագահ Էմանուել Մակրոնը սկսել են քննարկել բրիտանացի և ֆրանսիացի զինվորներին Ուկրաինա ուղարկելու հնարավորությունը՝ որպես խաղաղապահ ուժեր այն դեպքում, եթե ձեռք բերվի ռուս-ուկրաինական պատերազմը դադարեցնելու համաձայնություն։ Այս մասին հայտնել է բրիտանական The Telegraph թերթը՝ հղում անելով աղբյուրներին։

 Մեծ Բրիտանիայի կառավարությունում պարբերականի բազմաթիվ աղբյուրներ նշել են, որ Սթարմերը վերջնական որոշում չի կայացրել։ Կառավարության աղբյուրներից մեկը The Telegraph-ին ասել է. «Մենք մի փոքր առաջ ենք վազում: Մենք դեռ չենք հասել նպատակին»։

Bloomberg գործակալության աղբյուրները նույնպես հայտնել են, որ Մեծ Բրիտանիայի կառավարությունը սկսել է ակտիվորեն քննարկել Ուկրաինայում խաղաղապահ ուժեր տեղակայելու հնարավորությունը։ Գործակալության զրուցակիցները նշել են, որ անվտանգության խնդիրների պատճառով այս գաղափարն ունի հակառակորդներ Քիր Սթարմերի գրասենյակի և Մեծ Բրիտանիայի այլ կառավարական կառույցների աշխատակիցների շրջանում։

Bloomberg-ը նշել է, որ Քիր Սթարմերը, ինչպես սպասվում է, խաղաղապահների հարցը կարող է քննարկել Ուկրաինայի նախագահ Վլադիմիր Զելենսկու հետ հանդիպմանը։ Associated Press-ը հաղորդել է, որ Սթարմերը իր առաջին այցն է կատարել Կիև, նրա ուղևորության մասին նախապես չէր հայտարարվել:

Ուկրաինայում եվրոպական ռազմական կոնտինգենտի տեղակայման թեման՝ որպես հրադադարի հնարավոր համաձայնագրի երաշխիք, սկսել է քննարկվել այն բանից հետո, երբ դեկտեմբերին Փարիզում հանդիպեցին Ֆրանսիայի նախագահ Էմանուել Մակրոնը, ԱՄՆ նորընտիր նախագահ Դոնալդ Թրամփը և Ուկրաինայի նախագահ Վլադիմիր Զելենսկին։ Ինչպես նշում է The Telegraph-ը, Մակրոնը խաղաղապահների հարցը արդեն քննարկել է Լեհաստանի վարչապետ Դոնալդ Տուսկի հետ դեկտեմբերի կեսերին, ինչպես նաև Վլադիմիր Զելենսկու հետ հունվարի 13-ին կայացած հեռախոսազրույցի ժամանակ։