«ՀԱՊԿ-ից դուրս գալու պարագայում մեր խնդիրները ավելի փոքր են, քան ՀԱՊԿ-ում մնալու պարագայում։  Իմ ընկալմամբ՝ կառավարությունը ունի ինքնատիպ ռազմավարություն՝  ստեղծել այնքան շատ խնդիրներ ՀԱՊԿ-ի ներսում, որ ՀԱՊԿ-ը դուրս հանի իր կազմից ՀՀ-ին. նման բան արել է Ուզբեկստանը։ Ուզբեկստանը ՀԱՊԿ-ից դուրս է եկել ՀԱՊԿ-ի որոշմամբ։ Իմ ընկալմամբ՝ ՀՀ-ն էլ է այդպես ցանկանում անել, այսինքն՝ չի վճարում անդամավճարները, չի մասնակցում զորավարժություններին և կառավարման պրոցեսում է խնդիրներ ստեղծում։ Եթե ՀԱՊԿ-ը որոշի, որ ՀՀ-ն պետք է դուրս գա այդ կազմակերպությունից, ապա ՀՀ-ն կազատվի այն քաղաքական պատասխանատվությունից, որը կունենար ՀԱՊԿ-ից դուրս գալու պարագայում»: Այս մասին ասաց քաղաքագետ Արեգ Քոչինյանը՝ անդրադառնալով հայ-ռուսական հարաբերություններին ու ՀԱՊԿ-ից Հայաստանի դուրս գալու նպատակահարմարությանը։

Քոչինյանը հասկանաի է համարում նաև այն կարծքիը, որ ՀՀ-ն ՀԱՊԿ-ից դուրս չգալը փորձում է որպես գործիք օգտագործել ՌԴ-ի դեմ, բայց այն հնարավորությունը, որը այսօր է տրված, փաստ չէ, որ վաղը ևս լինելու է. «Այսօր հնարավոր է ՀԱՊԿ-ից դուրս գալ, բայց ես վստահ չեմ, որ վաղը ևս հնարավոր է լինելու»։  

Քոչինյանի խոսքով՝ Արևմուտքից Հայաստանին կոչ կա զգուշավորության, և հորդոր չկա, որ ՀՀ-ն դուրս գա ՀԱՊԿ-ից, բայց դա արվում է նաև այն տրամաբանությամբ, որ Արևմուտքի վրա մեծ պատասխանատվություն չընկնի Հայաստանի հետ կապված. «Ուկրաինայի դեպքում ևս Արևմուտքը կոչ էր անում չհարվածել ՌԴ-ին՝ ելնելով իր շահերից, բայց դա Ուկրաինայի շահերից չէր բխում։ Իհարկե, ՀԱՊԿ-ից դուրս գալու դեպքում ՀՀ-ին երաշխիքներ չկան, բայց մենք ի՞նչ անենք այդ դեպքում, պիտի կորչի՞ մեր ազնիվ ցեղը զուր տեղը։ Կարծում եմ՝ կա զարգացման հնարավորություն, որ ՀՀ-ն դուրս գա ՀԱՊԿ-ից ու փաստի առաջ կանգնեցնի իր արևմտյան գործընկերներին, այդ դեպքում պատասխանատվությունը սեփական ուսերին չվերցնելը արևմտյան գործընկերների համար բարձր գին է արժենում։ Նավը որը չի շարժվում, ոչ մի տեղ էլ չի հասնում»։

Ինչ վերաբերում է ԵԱՏՄ-ից դուրս գալու կոչերին, ապա Քոչինյանը նշեց, որ մինչ այդ նախ պետք է ՀՀ-ում ապրանքների որակական ստանդարտները բարձրացնել. «Այս երկրի տնտեսական դիմադրողականության տեսանկյունից ամենակարևորը ոչ թե ԵԱՏՄ-ից դուրս գալն է, այլ մեր արտադրանքների որակական բարձր չափանիշները»։

Քոչինյանի կարծիքով՝ եթե պետությունը չի կարողանում այնպես անել, որ ՀՀ-ում արտադրանքները բարձր որակի լինեն, ապա պետական համակարգը լավ չի աշխատում. «Չեմ ուզում մտածել, որ պետությունը իմպոտենտ է։ Ամեն ինչ փոխվում է պետական քաղաքականության արդյունքում, ու մենք մեր ներսում պետք է խոսենք որակական ստանդարտների բարձրացման մասին։ Սա ներքին աշխատանք է, որը մեզ վաղը հնարավորություն է տալու ԵՄ-ի, Պարսից ծոցի ու այլ ուղղություններով զարգացնել արտահանումը։ Երբ որ դու ունես բարձր որակի արտադրանք, ապա խնդիր չի լինում արտահանել որևէ տեղ»։

Մանրամասն՝ տեսանյութում

Դավիթ Լևոնյան