Իսրայելի «Բեն Գուրիոն» միջազգային օդանավակայանը երկուշաբթի օրը չվերթներ չի իրականացնի «Հիստադրութ» արհմիության կողմից կազմակերպված գործադուլի պատճառով՝ ի նշան իրավական բարեփոխումների դեմ բողոքի: Այս մասին հայտնում է The Jerusalem Post-ը։ 

«Թռիչքները դադարեցվել են մինչև հետագա կարգադրությունը»,- պարբերականը մեջբերում է կատարում արհմիության ղեկավարի հաղորդագրությունից: 

Այսօր Իսրայելում գործադուլի պատճառով չեն գործի նաև մանկապարտեզները, դպրոցները և առևտրի կենտրոնները, դրանցից որոշները կբացվեն վաղը: 

Դատական բարեփոխումների դեմ զանգվածային բողոքի ցույցերը, որոնք շարունակվում են արդեն 12 շաբաթ, հանգստյան օրերին հանգեցրել են բախումների ոստիկանության հետ, որոնք մի շարք դեպքերում ստիպված են եղել օգտագործել արցունքաբեր գազ և ջրցան մեքենաներ։