Կատալոնական «Բարսելոնան» 1,4 միլիոն եվրո է վճարել իսպանական մրցավարական կոմիտեի պաշտոնյային, հաղորդում է SER Catalunya-ն:
Կատալոնացիներն այս գումարը վճարել են 2016-ից 2018 թվականներին: Այդ ժամանակ Իսպանիայի ֆուտբոլի ֆեդերացիայի մրցավարական կոմիտեի տեխնիկական փոխնախագահի պաշտոնը զբաղեցնում էր Էնրիկես Նեգրեյրան:
Գործը հետաքննում է Կատալոնիայի դատախազությունը: Էնրիկես Նեգրեյրան արդեն ցուցմունք է տվել և հայտարարել, որ վճարվումները կատարվել են խորհրդատվական աշխատանքի համար, իսկ մրցավարները «Բարսելոնային» մասնակցությամբ հանդիպումները սպասարկել են այնպես, ինչպես բոլոր թիմերի դեպքում:
Այնուամենայնիվ, Էնրիկես Նեգրեյրան հարկային մարմիններին չի կարողացել ցույց տալ ոչ մի փաստաթուղթ, որ խորհրդատվական ծառայություններ է մատուցել «Բարսելոնային»:
«Բարսելոնան» այդ լուրից հետո պաշտոնական հայտարարություն է տարածել և փորձել հերքել մամուլում շրջանառվող լուրերը:
«Հաշվի առնելով այն տեղեկությունը, որն այսօր հայտնվել է ԶԼՄ-ներում, «Բարսելոնան», իմանալով հետաքննության մասին, ցանկանում է հստակեցնել.
- «Բարսելոնան» նախկինում ևս օգտվել է տեխնիկական խորհրդատուի ծառայություններից, որն իրենից ներկայացնում է տեսաձևաչափի տեսքով տեխնիկական հաշվետվություններ ակումբի տեխնիկական անձնակազմի համար:
- Տեխնիկական հաշետվություններ ստանալը հիմնական և երկրորդ կազմի թիմի համար սովորական պրակտիկա է գրեթե բոլոր ֆուտբոլային ակումբների համար:
- Այս պահին նման ծառայություններ մատուցում է մասնագետ, որն ընդգրկված է մեր ակումբի աշխատակազմում:
- «Բարսելոնան» ափսոսում է, որ այս տեղեկությունը համացանց է արտահոսել մրցաշրջանի ամենաթեժ հատվածում:
- «Բարսելոնան» դատի կտա յուրաքանչյուրին, որը կփորձի փչացնել մեր ակումբի բարի համբավը»,- ասվում է կատալոնական ակումբի պաշտոնական հաղորդագրության մեջ:
