Մոտ 200 մարդու, այդ թվում՝ ԱՄՆ քաղաքացիների, «Թալիբան»-ը թույլատրել է լքել Քաբուլը Կատար մեկնող չվերթով։ Այս մասին հաղորդում է CNN-ը:
 
Դեռևս անհայտ է՝ քանի՞ ամերիկացի կլինի մեկնող ինքնաթիռում, կամ ի՞նչ ազգություն կարող են ունենալ մնացած տարհանվածները:
 
Քաբուլից Դոհա մեկնող չվերթին հերթագրվող մի քանի ուղևորներ նշել են, որ իրենց վերջնական կետը Կանադան է: «Մենք գնում ենք Կանադա, մենք կանադացիներ ենք»,- օդանավակայանում  անգլերենով ասել է մի տղամարդ արաբական  «Ալ-Ջազիրա»-ի լրագրողին: Եվս երկուսը կրկին ասել են՝ մեկնելու են Կանադա:
 
Նշենք, որ ավելի վաղ «Թալիբան» շարժման արտաքին գործերի նախարարի պաշտոնակատար Մավլավի Ամիր Խան Մութաքին շնորհակալություն էր հայտնել Կատարի հատուկ պատվիրակ Մութլաք Ալ-Քահթանիին՝ Քաբուլի միջազգային օդանավակայանից թռիչքները վերսկսելու ուղղությամբ իր երկրի գործադրած ջանքերի համար:
 
Սպասվելիք չվերթի մասին ամերիկացի պաշտոնյաներից մեկը  CNN-ին հայտնել  է, որ թալիբները մոտ 200 մարդու հեռանալու իրենց  համաձայնությունը տվել են այն բանից հետո, երբ Աֆղանստանում ԱՄՆ հատուկ ներկայացուցիչ Զալմայ Խալիլզադը ճնշում է գործադրել նրանց վրա:
 
Նշենք, որ ԱՄՆ պետքարտուղար Էնթոնի Բլինքենը չորեքշաբթի օրը «Թալիբան»-ին մեղադրել էր  Աֆղանստանի հյուսիսում  չարտերային թռիչքները չեղարկելու  համար՝  նշելով, որ զինյալները մարդկանց թույլ չեն տալիս հեռանալ: Թալիբներն, իրենց հերթին, պնդում էին, որ ուղևորներից շատերը չունեն անհրաժեշտ փաստաթղթերը։
 
Սյուզի Սիրականյան