Աֆղանստանի մայրաքաղաք Քաբուլում բողոքի մեծ ցույցը ցրելու համար թալիբները նախազգուշական կրակ են արձակել օդ, ինչը գրոհայինները արգելել էին անցյալ շաբաթ, երբ տոնական օդային կրակոցների պատճառով զոհեր գրանցվեցին, գրում է BBC-ն։
 
Տարածված տեսանյութերը՝ դեպքի վայրից, ցույց են տալիս, թե ինչպես են մարդիկ վազում դեպի անվտանգ վայրեր, մինչդեռ հետին պլանում լսվում են կրակոցների ձայներ:
 
Հազարավոր քաղաքացիներ այսօր դուրս են եկել փողոց՝ կանանց իրավունքների համար բողոքի ցույցեր իրականացնելու և  թալիբների իշխանությունը դատապարտելու համար: Կանայք բողոքի ակցիաներ էին անցկացնում անցած շաբաթվանից, սակայն այսօր տղամարդիկ նույնպես միացել են նրանց հավասարության և անվտանգության կոչերին: Շատ ականատեսներ նշել  էին, որ կանանց գլխավորած նախորդ հանրահավաքներին տղամարդիկ ներկա չէին:
 
Ցուցարարները նաև վանկարկել են  հակապակիստանյան կարգախոսներ, քանի որ շատերը կարծում են, որ հարևան Պակիստանը սատարում է թալիբներին, ինչը երկիրը հերքում է:
 
BBC-ի հաղորդմամբ՝ տեղում աշխատող որոշ լրագրողների, այդ թվում՝ BBC-ի թիմին, թույլ չեն տվել  նկարահանել հանրահավաքը, իսկ աֆղանական Tolo News գործակալությունը հայտնել է, որ նրանց թիմի օպերատորը ձերբակալվել է՝ տեղական և արտասահմանյան այլ ԶԼՄ ներկայացուցիչների հետ միասին:
 
Սյուզի Սիրականյան