«Կանայք և գլոբալ անվտանգային  ճարտարապետությունը» մտակենտրոնի ավագ փորձագետ Էլեն Հոխիկյանի  խոսքով՝ նորություն չէ, որ ՌԴ-ում բնակվող մեր հայրենակիցներին պարտադրում են գալ ու քվեարկել Սամվել Կարապետյանի օգտին: «Որքանով կհաջողվի 100.000 մարդ բերել՝ չեմ կարող ասել, բայց նմանատիպ պլաններ եղել են։ Ինչքանով դա կազդի ընտրությունների ելքի վրա՝ միանշանակ չէ»,- Civic.am-ի տաղավարում ասաց նա։

Հոխիկյանի դիտարկմամբ՝ վերջին ամիսների ընթացքում ՌԴ-ից պարբերաբար կրկնում են այն միտքը, որ եթե իրենք կորցնեն Հայաստանը, կորցնում են Հարավային Կովկասը։ Ինչո՞ւ պետք է ՌԴ-ն պահանջի, որ Հայաստանում հանրաքվե անցկացվի՝ հարցին ի պատասխան Հոխիկյանն ասաց․ «Հետաքրքիր է, երբ, օրինակ, Ռուբիոն է գալիս Հայաստան, կամ Դոնալդ Թրամփն է աջակցություն հայտնում Փաշինյանին, ինչ-որ մարդիկ այդտեղ խնդիրներ են տեսնում առ այն, որ սա մեր ընտրություններին միջամտության փորձ է։ Բայց երբ ՌԴ նախագահն ասում է, որ Հայաստանում պետք է անցկացվի հանրաքվե, որպեսզի ՀՀ քաղաքացիները որոշեն՝ ուր են գնում, նույն այդ դերակատարները որևէ կերպ դա չեն համարում միջամտություն ՀՀ ներքին գործերին»։

Մեր զրուցակցի  խոսքով՝ թե ինչ ֆորմատով ՀՀ-ն հանրաքվե կանցկացնի՝ կորոշեն ՀՀ իշխանություններն ու ժողովուրդը: «Այո՛, ժամանակին վարչապետն ասել է, որ հանրաքվե անցկացնելու նպատակ կա, երբ բանը հասնի նրան, որ  անհրաժեշտություն լինի որոշելու՝ ՀՀ քաղաքացին հակված է ԵՄ անդամակցությա՞նը, թե՞ ոչ, բայց չեմ կարծում, որ երրորդ պետության ղեկավարն իրավունք ու իրավասություն ունի նման կոչով դիմելու Հայաստանի Հանրապետությանը»,- եզրափակեց նա։

Հարցազրույցն ամբողջությամբ՝ տեսանյութում

Մարիամ Գրիգորյան