Թուրքիայի արտաքին գործերի նախարար Հաքան Ֆիդանը հայտարարել է, որ Իրանի կողմից առանց տարբերակման տարածաշրջանի մի շարք երկրների հասցվող հարվածները «անհավանական սխալ ռազմավարություն» են։
TRT Haber-ին տված հարցազրույցում Ֆիդանը նշել է, որ խոսքը վերաբերում է Օմանին, Քաթարին, Քուվեյթին, Բահրեյնին, Սաուդյան Արաբիային, Արաբական Միացյալ Էմիրություններին և Հորդանանին։
«Եթե սա շարունակվի որոշակի կետից ավելի, նրանց համար անհնար կլինի լռել»,- ասել է Թուրքիայի ԱԳ նախարարը՝ ընդգծելով, որ տարածաշրջանը ներկայում չափազանց ծանր օրեր է ապրում։
Ֆիդանի խոսքով՝ իրավիճակը կարող է վերածվել բազմաճակատ հակամարտության, եթե Իրանի կողմից հարձակման ենթարկված երկրները օգտվեն պատասխան հարվածի իրենց իրավունքից։
«Անկեղծ ասած՝ սա մեզ անհանգստացնում է։ Մեր գնահատականներով՝ պատերազմը կարող է վերածվել մի քանի ճակատով հակամարտության»,- նշել է նա։
Թուրք դիվանագետը հավելել է, որ տարածաշրջանը վերջին երկու տասնամյակների ընթացքում արդեն կրել է մեծ ցավ և պատերազմներ, իսկ ներկայիս հակամարտությունը չի սահմանափակվում միայն Իրանով։
Ֆիդանի գնահատմամբ՝ երբ Թեհրանը կանգնում է էկզիստենցիալ սպառնալիքի առաջ, որդեգրում է «եթե ես ընկնեմ, ինձ հետ կտանեմ տարածաշրջանը» մոտեցումը՝ թիրախավորելով հատկապես էներգետիկ ենթակառուցվածքները, որոնք կարևոր նշանակություն ունեն համաշխարհային տնտեսության և էներգետիկ անվտանգության համար։
