Օգոստոսի 3-ին Երևանում կայացած համաշխարհային աստղ Ջենիֆր Լոպեսի մենահամերգը Հայաստան էր բերել մեծ թվով զբոսաշրջիկների: Նրանց գերակշիռ մասը ժամանել էր Վրաստանից և բացի համերգը վայելելուց, նրանք շրջել են Հայաստանով ու Երևանով, իսկ մի մասը՝ կիսվել տպավորությունների մասին:
Վրացի հայտնի բլոգեր, ճանապարհորդ, դերասան և հաղորդավար Գուրամ Շերոզիան սոցցանցերի իր էջերում հիացական գրառումներ է կատարել, հրապարակել լուսանկարներ Կասկադից և Գառնու տաճար այցելությունից:
«Ես հիացած եմ Ջենիֆեր Լոպեսով և մինչև հիմա շոկի մեջ եմ:
Բայց առավել ուրախ եմ, որ այսքան վրացիների Երևանում ես դեռ չէի տեսել:
Հիմա, երբ հետևում են Ջեյ Լոյի մասին տպավորությունները, արդեն տեսանելի ու ցայտուն են, թե ինչքան գեղեցիկ, կենդանի ու ժամանակակից քաղաք է Երևանը, ինչքան հյուրասեր ու բարի մարդիկ են այստեղ ապրում, ինչքան բարձր է սպասարկման ոլորտն այստեղ, որքան հիասքանչ ուտեստներ են պատրաստվում ու մատուցվում, որքան օրիգինալ ու բարձրաճաշակ ռեստորանների միջև կարող ես ընտրել:
Հիասքանչ են Կասկադը, Հանրապետության հրապարակը, Հյուսիսային պողոտան, հին ու նոր երևանը, Գառնին, Զվարթնոցը, Գեղարդը, Էջմիածինն ու շատ այլ վայրեր:
Հիմա, կարծում եմ, հասկանում եք, թե ինչու եմ ես այդքան հաճախ վազում այստեղ: Մենք էսկուրսիայի էինք ուղևորվել 20 հոգով ու բոլոր 20-ն էլ կրկին վերադարձել են Հայաստան:
Հիանալի ժամանակ անցկացրեցինք, շնորհակալ եմ»,- գրառումներից մեկում գրել է նա:
Նրա էջերում նաև Ջեյ Լոյի համերգից բազմաթիվ կտորներ կան՝ լի համերգի մասին հիացական մեկնաբանություններով:
