Այսպես կոչված՝ ցանկացողների
կոալիցիան, որոնց մասնակիցները պատրաստ են Ուկրաինայում հրադադարի դեպքում այդ
երկիր ուղարկել իրենց զորքերը որպես խաղաղության պահպանման երաշխիք, պատրաստ է
ավելի քան 10.000 մարդկանց թվաքանակով կոնտինգենտ կազմել։ Բրիտանական The Times
թերթի փոխանցմամբ՝ այս մասին մարտի 15-ին հայտարարել է Մեծ Բրիտանիայի վարչապետ Քիր
Սթարմերը Արևմուտքի մի շարք երկրների ղեկավարների հետ առցանց խորհրդակցության
ժամանակ։
Մեծ
Բրիտանիայի կառավարությունում բարձրաստիճան աղբյուրները, ինչպես պնդում է Times-ը,
պարբերականին հայտնել են, որ առաքելությանը պատրաստ են մասնակցել զգալի թվով
երկրներ, սակայն կոնտինգենտի հիմնական մասը կկազմեն Մեծ Բրիտանիայի և Ֆրանսիայի զինվորականները:
Երկրները, որոնք պատրաստ չեն ուղարկել իրենց զինվորականներին, պատրաստ են
առաքելությանը տրամադրել զենք, նյութատեխնիկական և հետախուզական աջակցություն։ Նշվում
է, որ ընդհանուր առմամբ խոսքը մոտավորապես 35 երկրի մասին է։ Չի հաղորդվում, թե
արդյոք ԱՄՆ-ը նրանց թվո՞ւմ է։
Ավելի վաղ Մեծ Բրիտանիայի և Ֆրանսիայի առաջնորդները ԱՄՆ-ի աջակցությունն անվանել
էին Ուկրաինայում ցանկացած հնարավոր խաղաղապահ առաքելության առանցքային տարր,
նույնիսկ եթե ամերիկյան զորքերը չներգրավվեն դրանում:
Խորհրդակցությանը, որը տեղի է ունեցել
նախօրեին, մասնակցել են 29 երկրների, այդ թվում՝ ԵՄ երկրների մեծ մասի, Կանադայի,
Ավստրալիայի, Նոր Զելանդիայի ներկայացուցիչներ, ինչպես նաև ՆԱՏՕ-ի գլխավոր
քարտուղար Մարկ Ռյուտեն։ Ավելի վաղ Փարիզում և Լոնդոնում կայացած հանդիպումների
ժամանակ արևմտյան երկրները հայտարարել էին «ցանկացողների կոալիցիա» ստեղծելու
մասին՝ երկրների խումբ, որը պատրաստ է օգնություն ցուցաբերել Ուկրաինային։ Մեծ Բրիտանիան
և Ֆրանսիան նաև իրենց զինծառայողներին խաղաղապահ առաքելությամբ ուղարկելու պատրաստակամություն
են հայտնել՝ ռազմական գործողությունների ավարտից հետո։
Կրեմլը բազմիցս հայտարարել է, որ անընդունելի
է համարում ՆԱՏՕ-ի երկրների զորքերի ներկայությունը Ուկրաինայի տարածքում։
Անվտանգության խորհրդի փոխնախագահ Դմիտրի Մեդվեդևը, որը հաճախ է հանդես գալիս
միտումնավոր արմատական և ոչ դիվանագիտական հայտարարություններով, կիրակի օրը գրել է, որ Հյուսիսատլանտյան դաշինքի երկրների զինվորականների ներկայությունը Ուկրաինայում կհանգեցնի «ՆԱՏՕ-ի հետ
պատերազմի»։ Միաժամանակ նա գրել է, որ խաղաղապահները չպետք է լինեն ՆԱՏՕ-ի
երկրներից։
Ֆրանսիայի նախագահ Էմանուել Մակրոնն իր
հերթին հայտարարել է, որ Ռուսաստանը իրավունք չունի վետո դնելու Ուկրաինայում
օտարերկրյա զինվորականների տեղակայման վրա, եթե Կիևի իշխանությունները նրանց հրավիրեն։
Մակրոնը նաև հայտարարել է, որ խաղաղապահ ուժերը կարող են կազմված լինել ինչպես
եվրոպական, այնպես էլ ոչ եվրոպական երկրների ներկայացուցիչներից։
«Ցանկացողների կոալիցիայի» ներկայացուցիչներն
ընդգծում են, որ Ուկրաինայում զինվորականների
տեղակայման մասին խոսք կարող է լինել միայն հրադադարից հետո՝ որպես Ռուսաստանին հետագա ագրեսիայից զսպող գործոն։
Մոսկվան առայժմ ոչ ընդունել է,
ոչ էլ մերժել 30-օրյա հրադադարի մասին ԱՄՆ-ի առաջարկը, որին Կիևը համաձայնել է։
