Մոտ ժամանակներս Կուրսկի մարզի տարածքը պետք է ամբողջությամբ ազատագրվի թշնամուց։ Այս մասին հայտարարել է ՌԴ նախագահ Վլադիմիր Պուտինը։
Պուտինը մարտի 12-ին զինվորական համազգեստով ՌԴ ԶՈւ Կուրսկի խմբավորման հրամանատարական կետ է այցելել։ Նախագահին դիմավորել է ՌԴ զինված ուժերի գլխավոր շտաբի պետ Վալերի Գերասիմովը։ Նա ՌԴ նախագահին զեկուցել է Կուրսկի սահմանային գոտում տիրող իրավիճակի մասին։
«Ես մեծ հույս ունեմ, որ մեր ստորաբաժանումների առջև ծառացած բոլոր մարտական առաջադրանքները անվերապահորեն կկատարվեն, և Կուրսկի մարզը մոտ ապագայում ամբողջությամբ կազատագրվի հակառակորդից»,- ասել է Պուտինը։
Ինչպես ընդգծել է ՌԴ նախագահը, Կուրսկի շրջանում ռուսական զինված ուժերի դեմ հանդես եկողները ահաբեկիչներ են։
«Կուրսկում գտնվող բոլոր մարդիկ, ովքեր հանցագործություն են կատարում խաղաղ բնակչության դեմ, հակադրվում են մեր զինված ուժերին, իրավապահ մարմիններին և հատուկ ծառայություններին, ահաբեկիչներ են Ռուսաստանի Դաշնության օրենսդրության համաձայն: Այսպես է դասակարգվում նրանց գործողությունները Ռուսաստանի գլխավոր դատախազության կողմից, և «ահաբեկչության» հոդվածներով է քրեական գործ հարուցվել նրանց դեմ»։
Պուտինի հետ հանդիպմանը ՌԴ ԶՈւ գլխավոր շտաբի պետ Վալերի Գերասիմովն ասել է, որ Կուրսկի մարզում ազատագրվել է Ուկրաինայի Զինված ուժերի զբաղեցրած տարածքի ավելի քան 86%-ը։
«Վերջին հինգ օրվա ընթացքում ազատագրվել է 24 բնակավայր և 259 քառ. կմ տարածք Կուրսկի շրջանում։ Սահմանի որոշ հատվածներում ռուսական կործանիչները մտել են Սումիի շրջան»,–ասել է նա։
Նա հավելել է, որ Ուկրաինայի զինված ուժերի ավելի քան 400 զինվորներ գերի են ընկել Կուրսկի շրջանում։
