Եթե Հայաստանի իշխանությունները ցանկանում են ուղիղ բանակցություններ վարել Ադրբեջանի հետ՝ առանց Ռուսաստանի մասնակցության, ապա դա նրանց ընտրությունն է։ Այս մասին ասել է ՌԴ ԱԳ նախարար Սերգեյ Լավրովը՝ ելույթ ունենալով ՄԳԻՄՕ-ի դասավանդողների և ուսանողների առաջ։
«Նույն կերպ մենք
հիմա անհանգստացած ենք, որ եռակողմ պայմանավորվածությունները, որ Ռուսաստանը,
Հայաստանն ու Ադրբեջանը կնքել են 2020-2022 թվականների մի քանի գագաթնաժողովներում,
նույնպես առկախվել են: Ահա ես հիշատակեցի տրանսպորտային հաղորդակցության վերականգնումը,
այն այժմ գործնականում արդեն չի պատրաստվում: Երևանը համարում է, որ դա պետք է
արվի ուղիղ Ադրբեջանի հետ, բայց եթե նրանց հաջողվի, ապա ի սեր Աստծու»,- ասել է ՌԴ
ԱԳ նախարարը։
Նախարարի խոսքով՝ «բոլոր տարբերություններով և հակասություններով հանդերձ»,
Ռուսաստանը և նրա գործընկերները «ունեն ըմբռնում առ այն, թե ով ինչի համար է հանդես
գալիս, ու կա ցանկություն, և արդեն կա արդյունք այն բանում, ինչը վերաբերում է մեր
մոտեցումների մերձեցմանը համաձայնեցված զուգահեռ գործընթացների մշակման առումով»,
որը վերջնարդյունքում կունենա դրական բնույթ։
Ինչպես հայտարարել
է ՀՀ վարչապետ Նիկոլ Փաշինյանը օգոստոսի 31-ի ասուլիսում, Ադրբեջանի հետ ուղիղ
բանակցությունները դրական արդյունքներ են տալիս, և այժմ եռակողմ ձևաչափը
վերսկսելու անհրաժեշտություն չի տեսնում, այդ թվում՝ Ռուսաստանի մասնակցությամբ։
