Ռուսաստանի նախագահ Վլադիմիր Պուտինը մոնղոլական «Օնոոդոր» թերթին տված գրավոր հարցազրույցում Մոնղոլիայի հետ հարաբերությունների զարգացումն անվանել է Ռուսաստանի արտաքին քաղաքականության առաջնահերթություններից մեկը։

«Հիշեցնեմ, որ մեր երկիրն աշխարհում առաջինն է ճանաչել Մոնղոլիայի անկախությունը 1921 թվականին և երկար ժամանակ մնացել է նրա ինքնիշխանության և անվտանգության միակ երաշխավորը»,- ասել է Պուտինը։

Նրա խոսքով՝ Ռուսաստանն «արձագանքում է Մոնղոլիայի խնդրանքներին» արտոնյալ գներով վառելիքի և քսանյութերի մատակարարման վերաբերյալ։

Անդրադառնալով Ուկրաինայի թեմային՝ Պուտինն ասել է, որ Ուկրաինայի ստեղծման գործընթացը սկսվել է 1917 թվականի հեղափոխությունից անմիջապես հետո, երբ այս տարածքում առաջացան անկայուն և կարճատև քվազիպետական ​​կազմավորումներ՝ առանց հստակ սահմանների. «Հետագայում ԽՍՀՄ կազմում գտնվող միութենական հանրապետությունների սահմանները բավականին կամայականորեն են կտրվել ՝ ելնելով «պրոլետարական անհրաժեշտությունից»... Պետք է հասկանալ, որ սովետական առաջնորդները գործում էին իրենց ժամանակի աշխարհաքաղաքական իրողությունների պայմաններում՝ չենթադրելով, որ ԽՍՀՄ-ը կդադարի գոյություն ունենալ և կփլուզվի արհեստականորեն գծված ներքին վարչական սահմաններով»։

Ինչպես նշել է ՌԴ նախագահը, Ուկրաինայում ողբերգության հիմնական պատճառը հավաքական Արևմուտքի հակառուսական քաղաքականությունն է, և Ուկրաինան դարձել է մանրադրամ Արևմուտքի աշխարհաքաղաքական նկրտումների իրականացման գործում. «Արևմուտքը ֆինանսավորեց ազգայնական և հակառուսական կազմակերպություններին, ներդրեց այն ​​հայեցակարգը, թե Ռուսաստանի Դաշնությունն իբր Ուկրաինայի հավերժ թշնամին է»։

«Ռուսաստանը կշարունակի կատարել իր առջև դրված խնդիրները հատուկ գործողության շրջանակներում՝ ապահովելու համար սեփական անվտանգությունը»,- ընդգծել է ՌԴ նախագահը։