ՌԴ նախագահի մամուլի քարտուղար Դմիտրի Պեսկովը պնդում է, որ ՌԴ նախագահի աշխատակազմը չի խնդրել իր աշխատակիցներին հեռացնել նամակագրությունը Telegram-ից այն պատճառով, որ Ֆրանսիայում կալանավորվել է Telegram-ի հիմնադիր Պավել Դուրովը։ Այս մասին Պեսկովն ասել է օգոստոսի 27-ին լրագրողների հետ ճեպազրույցում։

«Նամակագրությունը մաքրելը կատարյալ հիմարություն է. սա առաջին։ Երկրորդ. պետական ​​ծառայողները, տեսականորեն, չպետք է օգտագործեն մեսենջերները ծառայողական նպատակներով, քանի որ ոչ մի մեսենջեր հուսալի չէ տեղեկատվական անվտանգության տեսանկյունից, և Telegram-ը նույնպես: Հետևաբար մենք (նախագահի) աշխատակազմում ոչ մի մեսենջեր չենք օգտագործում ծառայողական նպատակներով, քանի որ դա պարզապես կլիներ ծառայողական կանոնների և ծառայողական էթիկայի խախտում։ Ուստի այստեղ ոչ ոք ոչ մեկին որևէ բան մաքրելու կոչ չի անում»: Այսպես է Պեսկովը պատասխանել լրագրողի այն հարցին, թե արդյոք Կրեմլը շարունակո՞ւմ է օգտագործել Telegram-ը, և արդյոք վարչակազմի աշխատակիցներին խնդրե՞լ են հետացնել նամակագրությունը։

Լրագրողը, տալով իր հարցը, նշել է, որ Դուրովի ձերբակալությունից հետո մտավախություն է առաջացել, որ «գուցե բաց է հասանելիությունը Telegram-ի սերվերներին, այդ թվում՝ ռուս պաշտոնյաների նամակագրությանը»։

Օգոստոսի 25-ին Baza Telegram ալիքը, հղում անելով աղբյուրներին, հաղորդել է, որ իշխանությունները հրահանգել են տարբեր գերատեսչությունների պաշտոնյաներին, այդ թվում՝ նախագահի աշխատակազմին, ինչպես նաև որոշ խոշոր գործարարների ջնջել պաշտոնական նամակագրությունը Telegram-ից: Նույն օրը ռուս պրոպագանդիստ Մարգարիտա Սիմոնյանը հայտարարել էր, որ «բոլոր նրանք, ովքեր սովոր են Telegram-ն օգտագործել զգայուն խոսակցությունների/նամակագրության համար, պետք է հենց հիմա ջնջեն այդ նամակագրությունը և այլևս այդպես չանեն»։