«ՌԴ-ում անհանգստացած են, որ
եթե աշնանը ստորագրվի խաղաղության պայմանագիր ՀՀ-ի ու Ադրբեջանի միջև, ապա կվերանա
կոնֆլիկտը, ու ՌԴ-ն այլևս չի կարողանա կոնֆլիկտների միջոցով ՀՀ-ի ու Ադրբեջանի վրա
ազդել, իսկ եթե խաղաղության պայմանագրից դուրս է մնում ապաշրջափակման գործընթացը, ապ
ՌԴ-ն չի ստանում նաև Սյունիքով անցնող այդ ճանապարհը»: Այս մասին ասաց քաղաքագետ Ստյոպա
Սաֆարյանը՝ անդրադառնալով ՌԴ արտգործնախարար Սերգեյ Լավրովի հայտարարությանը, թե ՀՀ-ն
սաբոտաժի է ենթարկում Սյունիքի ճանապարհների ապաշրջափակման վերաբերյալ ձեռք բերված
պայմանավորվածությունները։
Սաֆարյանի խոսքով՝ Ադրբեջանը
բանակցային պրոցեսներում կորցրեց «Զանգեզուրի միջանցք» ստանալու հնարավորությունը.
«ՀՀ-ն պետք է կարողանա լուծել խաղաղության ու ճանապարհների ապաշրջափակման խնդիրները։ Հետագայում եթե հնարավորություն լինի, ապա պետք
է փորձել նաև բարձրաձայնել արցախահայերի վերադարձի խնդիրը, որը Արևմուտքը չի մոռացել»։
Սաֆարյանը նշեց, որ ըստ տեղեկությունների՝
հենց Վլադիմիր Պուտինն է Էրդողանին խոստացել «Զանգեզուրի միջանցքը», և ռուսները ասում են, որ
Ալիևը չստորագրի խաղաղության պայմանագիրը. «ՀՀ-ն ռուսական ֆորմատ վերադառնալու որևէ
տարբերակ չունի, քանի որ դա կործանարար կլինի Հայաստանի համար։ Այստեղ հարցը այն է,
թե արդյոք ԱՄՆ-ն բավարար ճնշումներ կգործադրի՞ Ադրբեջանի վրա, որպեսզի խաղաղության
պայմանագիրը Ալիևը ստորագրի»։
Քաղաքագետի կարծիքով՝ ՀՀ-ն վերադարձ
չունի ՀԱՊԿ, քանի որ այնտեղ բոլորը մեր թշնամու գործընկերներն են։ Ինչ վերաբերում է
Արևմուտքի ու ՀՀ-ի գործընկերության հնարավորություններին, Սաֆարյանը կարծում է, որ
շատ բան կախված է նաև Վրաստանում տեղի ունեցող փոփոխություններից. «Վրաստանի ու Հայաստանի
որոշումները կայացվելու են միասնաբար։ ՀՀ-ի ու Վրաստանի ճակատագրերը կապված են, ու
եթե Վրաստանը ԵՄ-ի համար համարվի կորսված երկիր, ապա ՀՀ-ին Արևմուտքը լավագույն դեպքում
կօգնի պահել անկախությունը, բայց ԵՄ-ից կամ ՆԱՏՕ-ից դուռ չեն բացի»։
Մանրամասն՝ տեսանյութում
Դավիթ Լևոնյան
