Ռուսաստանը երախտապարտ է Ադրբեջանին՝ երկրում ռուսաց լեզվի նկատմամբ ցուցաբերած ուշադրության և այն դպրոցների աշխատանքի համար, որոնցում ուսումնասիրվում է այդ լեզուն։ Այս մասին հայտարարել է ՌԴ նախագահ Վլադիմիր Պուտինը պետական ​​այցի ընթացքում իր ադրբեջանցի գործընկեր Իլհամ Ալիևի հետ բանակցությունների սկզբում։

«Երախտապարտ ենք ձեզ այն ուշադրության համար, որ դուք ցուցաբերում եք ռուսաց լեզվի զարգացմանը: Ադրբեջանում գործում են 300 ռուսալեզու դպրոցներ, մեր առաջատար բարձրագույն ուսումնական հաստատությունների մասնաճյուղեր», - նշել է ՌԴ նախագահը։

Պուտինը հիշեցրել է հումանիտար համագործակցության հարցերով միջկառավարական հանձնաժողովի աշխատանքի մասին։ «Բոլորովին վերջերս՝ տասն օր առաջ, այստեղ՝ Բաքվում, տեղի է ունեցել միջկառավարական հանձնաժողովի հերթական նիստը, (հանձնաժողովը) հաջողությամբ աշխատում է»,- նշել է ՌԴ նախագահը։

Ռուսաստանի ղեկավարը հիշեցրել է նաև հունիսին Ադրբեջանում անցկացված Ռուսաստանի մշակույթի օրերը։ «Շատ շնորհակալություն ձեզ այս աշխատանքը կազմակերպելու համար»,- Պուտինը շնորհակալություն է հայտնել Ալիևին։