ՌԴ նախագահ Վլադիմիր Պուտինը հայտարարել է, որ ներկայում
Ռուսաստանի պաշտպանության նախարարության հիմնական խնդիրն է «թշնամուն դուրս մղել
մեր տարածքներից և ապահովել սահմանների հուսալի ծածկը»։ Այս մասին նա ասել է
Ուկրաինային սահմանակից տարածաշրջաններում տիրող իրավիճակի վերաբերյալ խորհրդակցությանը,
փոխանցում է «Ինտերֆաքս»-ը։
«Գլխավոր խնդիրն, անշուշտ, դրված է ՊՆ-ի առջև՝ թշնամուն
դուրս մղել մեր տարածքներից և սահմանապահ ծառայության հետ միասին ապահովել պետական
սահմանի հուսալի ծածկը։ ԱԴԾ-ն ռուսական գվարդիայի հետ միասին պետք է ապահովի հակաահաբեկչական իրավիճակի ռեժիմ և արդյունավետ պայքար հակառակորդի
դիվերսիոն-հետախուզական խմբերի դեմ։ <…> Տեղի ունեցող իրադարձությունների
գնահատականը պետք է տրվի անվերապահորեն։ Դա կարվի։ Բայց հիմա գլխավորը հրատապ
խնդիրների լուծումն է, որոնք ի հայտ են գալիս տվյալ պահին և բխում են իրավիճակի
զարգացման կանխատեսումներից»,- ասել է Պուտինը։
Պուտինի կարծիքով՝ Կիևը, Արևմուտքի օգնությամբ, ձգտում է
բարելավել իր բանակցային դիրքերը ապագայում՝ հարձակվելով Ռուսաստանի տարածքի վրա։
