Ռուսաստանի Դաշնությունը պատրաստ է իր հարթակը տրամադրել Ադրբեջանի և Հայաստանի ներկայացուցիչների միջև բանակցությունների համար և նրանց համար ստեղծել առավելագույն հարմարավետ պայմաններ։ Այս մասին ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Հայաստանի հետ խաղաղության պայմանագրի վերաբերյալ Ադրբեջանի ղեկավարի հայտարարությունները։
Նրա խոսքով՝ Ռուսաստանը դեռ 2022 թվականին (որը ամրագրված է Ռուսաստանի, Հայաստանի և Ադրբեջանի ղեկավարների հոկտեմբերի 31-ի հայտարարության մեջ) ընդգծել է երկրների միջև խաղաղության պայմանագրի կնքման ակտիվ նախապատրաստման կարևորությունը՝ տարածաշրջանում կայուն և երկարաժամկետ խաղաղության հասնելու նպատակով, նաև պարտավորվել է հետագայում «դրան տրամադրել ցանկացած աջակցություն»։
«Այսինքն՝ մեր
մոտեցումը ոչ միայն կայուն է, այլև արձանագրված է այն փաստաթղթում, որի տակ դրված
է մեր երկրի ստորագրությունը: Նման աջակցության ծավալներն ու ձևը պետք է ընդունելի
լինեն բանակցող կողմերից յուրաքանչյուրի համար՝ համաձայն ձեռք բերված
պայմանավորվածությունների։ Մոսկվան բազմիցս ընդունել է խաղաղության պայմանագրի
նախագծի շուրջ ադրբեջանա-հայկական բանակցությունների փուլեր: Պատրաստ ենք դա անել նաև
ապագայում»,- ասել է Զախարովան։
