Հին Բաբելոնի և Հնդկաստանի օրենքները, ինչպես նաև Հին Կտակարանը և Ղուրանը Ռուսաստանին իրավունք են տալիս միջուկային զենք օգտագործել Արևմուտքում իր հակառակորդների դեմ, վստահեցրել է ՌԴ Անվտանգության խորհրդի փոխնախագահ Դմիտրի Մեդվեդևը։

«Ակն ընդ ական, ատամն ընդ ատաման» սկզբունքը կրում է պատմական բնույթ։ Այն արդեն դրսևորված էր Համուրապիի օրենքներում, Մանուի օրենքներում, 12 աղյուսակների օրենքներում և, իհարկե, Հին Կտակարանում ու Ղուրանում: Այնպես որ, չարին կարելի է և երբեմն էլ պետք է չարությամբ հատուցել»,- ասել է Մեդվեդևը «Արգումենտի ի ֆակտի»-ին տված հարցազրույցում։

Բայց, նրա խոսքով, Ռուսաստանը մտածում է «միլիոնավոր մարդկանց» ճակատագրի մասին և գիտակցում է մարդկության հանդեպ իր «պատմական պատասխանատվությունը»։ «...Մենք բարոյական և իրավական իրավունք ունենք համարժեք, սիմետրիկ կամ ասիմետրիկ պատասխան տալու մեր անվտանգությանն ու ինքնիշխանությանը ուղղակի վնաս հասցնելուն։ Դա ամրագրված է՝ այդ թվում նաև  միջուկային զսպման ոլորտում մեր պետական ​​քաղաքականության հիմունքներում»,- նշել է Մեդվեդևը։

 Նրա կարծիքով՝ եթե Ռուսաստանը հրաժարվի միջուկային զենքից, նրան կարող է սպասվել քայքայում և «լիակատար փլուզում», ինչը այնքան շատ են «ցանկացել և ցանկանում անգլո-սաքսոնական էլիտաները»։