Օրերս ՌԴ փոխարտգործնախարար Միխայիլ
Գալուզինը հայտարարել է, թե ՌԴ-ին մտահոգում է, որ Հայաստանում ԵՄ առաքելությունը կարող
է ստանալ մշտական կարգավիճակ։
Թեմայի վերաբերյալ Civic.am-ը
զրուցել է քաղաքագետ Դավիթ Ստեփանյանի հետ։
«Մտահոգության իրական պատճառն
այն է, որ Ռուսաստանը հասկանում է և զգում, որ դուրս է գալիս ոչ միայն Հայաստանից,
այլև Հարավային Կովկասից՝ ամբողջ տարածաշրջանից, և քայլերը բազմաթիվ են: Եվ Ադրբեջանից
զորակազմի դուրսբերումը, այսպես կոչված՝ խաղաղապահների. ես ինչու եմ այդպես ասում,
որովհետև Ռուսաստանն է այդպես ընկալում, որ ԼՂ-ն Ադրբեջան է, և հայ-ադրբեջանական սահմանից
նրանց զինվորականների՝ Հայաստանից դուրսբերման արդեն իսկ ավարտված գործընթացը, ինչպես
նաև Ռուսաստանը գնալով կրճատում է իր ռազմական ներկայությունը ընդհանուր տարածաշրջանում։
Եթե մենք դրանք գումարենք 2005-ին Վրաստանի տարածքից նրանց փաստացի դուրս գալը, ապա
Ռուսաստանը կորցնում է Հարավային Կովկասը, և իմիջիայլոց դա արվում է հենց ռուսների
ուղիղ համաձայնությամբ»,- ասաց քաղաքագետը։
Նա նշեց, որ եթե ռուսները շատ
ուզենային, դուրս չէին գա այստեղից, նրանք իրենք են դուրս գալիս, դա իրենց որոշումն
է, և այստեղ հերթական անգամ գալուզինների, զախարովաների, լավրովների միջոցով փորձ է
արվում այդ քաղաքականությունն արդարացնել։
«Ես չեմ ուզում չափազանցնել,
բայց Ռուսաստանը տարածաշրջանը հանձնում է Արևմուտքին. սա է փաստացի տեղի ունենում։
Եվ այս համատեքստում ուղղակի արդարացման փորձ է սեփական անատամ քաղաքականության, թե
տեսեք՝ ԵՄ դիտորդները եկել են։ Որտե՞ղ են եկել ԵՄ դիտորդները, դատարկ տեղն են, չէ՞,
եկել, «սուրբ տեղը, երբեք դատարկ չի մնում»։ Իսկ ինչու է այդ տեղը դատարկ եղել, ինչո՞ւ
ՀԱՊԿ-ը այդտեղ չէր, ինչո՞ւ ՀԱՊԿ-ը չէր պաշտպանում Հայաստանին։ Եթե պաշտպաներ, նրանք
չէին գա»,- ասաց Դավիթ Ստեփանյանը։
Մանրամասն՝ տեսանյութում
Լիլիթ Թադևոսյան
