Իրանը մշտապես ընդգծել է, որ օտարերկրյա զորքերի մուտքը Հարավային Կովկաս չի նպաստում անվտանգության ու կայունության հաստատմանը և տարածաշրջանի ժողովուրդների շահերի ապահովմանը։ Այս մասին այսօր Թեհրանում հայտարարել է Իրանի ԱԳՆ պաշտոնական ներկայացուցիչ Նասեր Քանանին։

Նրա խոսքով՝ Հարավային Կովկասի անվտանգությունը Իրանի կարևորագույն առաջնահերթություններից է։ Հարավային Կովկասի անվտանգությունն ազդում է ողջ տարածաշրջանի անվտանգության վրա:

Քանանին հայտարարել է, որ Իրանի ռազմավարությունը «բանակցություններ և բազմակողմ երկխոսություն վարելն է՝ օգտագործելով գոյություն ունեցող մեխանիզմները»՝ լուծելու համար տարաձայնությունները և հաստատելու համար խաղաղություն, կայունություն և անվտանգություն Հարավային Կովկասում:

«Հարավային Կովկասում ռազմականացման ուժեղացմանն ուղղված ցանկացած մոտեցում կբարդացնի տարածաշրջանում անվտանգության հետ կապված իրավիճակը և կվնասի տարածաշրջանում խաղաղության գործընթացին, և Իրանը դա չի ընդունի։ Տարածաշրջանի երկրները չեն ցանկանում ձևավորել մեխանիզմներ, որոնք կնպաստեն տարածաշրջանում իրավիճակի բարդացմանը»,- ասել է նա։