«Հանուն Հանրապետության» կուսակցության փոխնախագահ Ռուբեն
Մեհրաբյանի հետ զրուցել ենք ՌԴ-ի կողմից Հայաստանի
ապրանքների նկատմամբ սահմանափակումների, վարչապետի հեռախոսազրույցների և ներքաղաքական
իրավիճակի մասին։
Պուտինի հետ հանդիպմանը վարչապետ
Նիկոլ Փաշինյանն ընդգծել է, որ հայաստանյան ծագման ապրանքների՝ ՌԴ շուկա արտահանման
սահմանափակումները հակասում են Հայաստան–Ռուսաստան իրավապայմանագրային շրջանակին ու
Եվրասիական տնտեսական միության կարգավորումներին, և խնդրել է միջոցներ ձեռնարկել՝ այս
խնդիրները կարգավորելու ուղղությամբ։
Ռուբեն Մեհրաբյանի խոսքով՝ ռուսական
կողմի մամուլի հաղորդագրության մեջ նշված էր Ռուսաստանի արձագանքը վարչապետի այդ կոչին,
ինչը նշանակում է, որ իրավապայմանագրային հիմքը հայ-ռուսական հարաբերություններում
վաղուց արդեն չի աշխատում և դրա աշխատե- չաշխատելն ուղղակի դարձել է մեկ մարդու քմահաճույքի
տիրույթում գտնվող ինչ-որ մի բան։
«Իսկ դա նշանակում է, որ խնդիր
պետք է դրվի այդ դաշտից դուրս գալու։ Բնականաբար, այնպես չէ, որ մենք ուղղակի դեկլարատիվ
ենք անդամակցել էդ ամեն ինչին, հազարավոր թելերով մեզ կապել են և միայն մտադրությունների
դեկլարացիայով դուրս գալ այդ բեռի տակից հնարավոր չի լինի, այստեղ պետք է շատ հստակ
քաղաքական և վարչարարական, նաև օրենսդրական ալգորիթմ մշակվի և վերջ տանք էս կախվածությանը։
Ես իրատեսական համարում եմ, որ դա կարող է տևել մինչև երկու տարի, բայց հետևողականորեն
պետք է աշխատել, եթե ամեն ինչ ընթանա առանց ֆորսմաժորների, բայց մենք տեսնում ենք,
որ ֆորսմաժորների հավանականութունն էապես մեծացել է՝ կապված Ուկրաինայի դեմ Ռուսաստանի
կողմից վարվող պատերազմի դինամիկայի հետ»,- ասաց Ռուբեն Մեհրաբյանը։
Ինչ վերաբերում է Հայաստանի՝ Եվրոպական միությանն
անդամագրվելու հարցով ՀՀ-ում հանրաքվե անցկացնելուն, ինչի մասին ասվում է ԵԱՏՄ անդամ
չորս երկրների ղեկավարների սույն թվականի մայիսի 29-ին ընդունված համատեղ հայտարարության
մեջ, վարչապետ Փաշինյանը հեռախոսազրույցում ընդգծել է, որ հանրաքվեի անցկացումը գործնականում
հնարավոր է միայն ԵՄ-ին անդամագրման համար Հայաստանի կողմից Եվրոպական միությանը պաշտոնական
դիմում հղելուց և թեման առարկայական դարձնելուց հետո։
Այս առնչությամբ Ռուբեն Մեհրաբյանն
ասաց, որ սա փաստորեն վերջին քայլն է անդամակցության ճանապարհին, որը Հայաստանը պետք
է անի, իսկ Պուտինն առաջարկում է սայլը կապել ձիու դեմից և անել հիմա։
«Դե կներեք, մենք Պուտինի համար
«Yandex Eats»-ի ծառայություն չենք, որ իրա համար առաքում կազմակերպենք ըստ պատվերի»,-
հավելեց Ռուբեն Մեհրաբյանը։
Մանրամասները՝ տեսանյութում
Լիլիթ Թադևոսյան
