Ռուսաստանի նախագահի մամուլի քարտուղար Դմիտրի Պեսկովը հայտարարել է, որ Վլադիմիր Պուտինը խոշոր բիզնեսմենների հետ փակ հանդիպման ժամանակ չի առաջարկել բյուջե կամավոր մուծումներ կատարել պատերազմը ֆինանսավորելու համար: Այս առաջարկի մասին մարտի 26-ին հաղորդել է The Bell-ը: Պարբերականի տեղեկություններով՝ «երկրի համար այս դժվարին ժամանակահատվածում բիզնեսին թափ տալու» գաղափարը պատկանում է «Ռոսնեֆտ»-ի ղեկավար Իգոր Սեչինին, որն այն ներկայացրել է Պուտինին ուղղված նամակում:
Լրագրողների՝ այս տեղեկատվության վերաբերյալ մեկնաբանություններ տալու խնդրանքին ի պատասխան՝ Պեսկովը հայտարարել է. «Ճիշտ չէ,
որ գաղափարը Իգոր Սեչինինն է եղել։ Ճիշտ չէ, որ գումարը տրամադրվել է հատուկ ռազմական գործողությանը։ Ճիշտ չէ, որ Պուտինը դիմել է նման
խնդրանքով»։
Պուտինի մամուլի քարտուղարի խոսքով՝ հանդիպման ժամանակ մասնակիցներից մեկը
հայտարարել է, որ անհրաժեշտ է համարում պետությանը «որոշակի մեծ, շատ մեծ գումար» տալ, և դա եղել է իր ընտանիքի
որոշումը։ Ըստ Պեսկովի՝ այդ բիզնեսմենը նշել է, որ «հանդիպման մասնակիցների ճնշող մեծամասնությունը իր բիզնեսը սկսել
է 1990-ականներին, և, իհարկե, այդ սկիզբը հիմնականում այսպես թե այնպես կապված է եղել պետության հետ»։ «Շատերը իրենց պարտքն են համարում նման մուծումներ կատարելը», - նշել է նախագահի մամուլի քարտուղարը։
«Դա չի եղել նախագահ Պուտինի նախաձեռնությունը, չնայած,
իհարկե, պետության ղեկավարը ողջունել է նման նախաձեռնությունը»,- հավելել է
Պեսկովը։
Պուտինի մամուլի քարտուղարը հրաժարվել է հայտնել այն բիզնեսմենի անունը, որն անհրաժեշտ է համարել բյուջեին «շատ մեծ
գումար» տալ։ «Հանդիպումը դրա համար է փակ եղել, որպեսզի որևէ մանրամասն չտրամադրվի»,- ասել է նա։
