Երեկ Սերժ Սարգսյանը մի ուշագրավ
հայտարարություն է արել՝ նշելով, որ նրանք, ովքեր կփորձեն մեր հաշվին «աչոկ հավաքել»,
ճշմարտությունը կլսեն։ Ում է ակնարկում Սերժ Սարգսյանը։
Թեմայի վերաբերյալ զրուցել ենք
ԱԺ «Քաղաքացիական պայմանագիր» խմբակցության պատգամավոր Նարեկ Գրիգորյանի հետ։ Պատգամավորի խոսքով՝ Սերժ Սարգսյանը և մնացած բոլոր
ընդդիմադիրները օրգանական կապով կապված են միմյանց։
«Եթե Սերժ Սարգսյանը սկսի խոսել,
ու հուսով եմ՝ կխոսի, մեր հանրությունը կհասկանա, թե ինչի մասին է խոսքը, ու թե ինչեր
են արել միասին։ Ամեն դեպքում, ես կարծում եմ, որ իրենք հունիսի 7-ից հետո, երբ բոլորն
իրենց հասանելիքը կստանան՝ պարտության տեսքով, վստահ եմ՝ շատ բան կբացահայտվի, շատ
բան կխոսեն, ու հանրությունը շատ բանից տեղեկացված կլինի»,- ասաց պատգամավորը։
ԱԺ «Հայաստան» դաշինքի պատգամավոր Աղվան Վարդանյանն
ու ՀՀԿ փոխնախագահ Արմեն Աշոտյանը հրապարակային մեղադրանքներ են հնչեցրել՝ փորձելով
պարզել, թե ով է 2018 թվականին բերել գործող իշխանությանը։
Այս առնչությամբ էլ պատգամավորն
ասաց, որ չի կարծում, թե նրանք միմյանց հետ խնդիրներ ունեն, քանի որ իր համար Ռոբերտ
Քոչարյանը և Սերժ Սարգսյանը նույն անձնավորությունն են։
«Այն խոսույթը, որ իրենք տարածում
են ժողովրդի մեջ, թե ով է մեզ բերել իշխանության… մեզ իշխանության բերել է ժողովուրդը,
որի հետ իրենք բացարձակապես կապ չունեն։ Սերժ Սարգսյանը և Ռոբերտ Քոչարյանը չեն կարող
ժողովրդի հետ կապ ունենալ, որովհետև մենք գիտենք՝ ինչպիսի ընտրություններ են եղել իրենց
օրոք, ինչպես են իրենք ընտրվել, ինչ եղավ մարտի 1-ին, էդ նույն ժողովրդի վրա ոնց կրակեցին,
ունեցանք նաև զոհեր, և ես չեմ հավատում նրանց այդ գզվռտոցին»,- հավելեց պատգամավորը։
Մանրամասն՝ տեսանյութում
Լիլիթ Թադևոսյան
