Ուկրաինայի նախագահ Վլադիմիր Զելենսկին սեպտեմբերի 23-ին ԱՄՆ կատարած այցի ժամանակ ելույթ է ունեցել ՄԱԿ-ի Անվտանգության խորհրդի նիստում՝ նվիրված ռուս-ուկրաինական պատերազմին։ Նա, մասնավորապես, հայտարարել է, որ Ռուսաստանը կախված է Չինաստանից, և որ Պեկինը կարող է դադարեցնել պատերազմը Ուկրաինայում, բայց դա չի անում։

«Եթե Չինաստանն իսկապես ցանկանար դադարեցնել այս պատերազմը, կարող էր ստիպել Մոսկվային դադարեցնել ներխուժումը»,- ասել է Զելենսկին։

«Առանց Չինաստանի պուտինյան Ռուսաստանը ոչինչ է։ Սակայն Չինաստանը չափազանց հաճախ լռում է և անտարբեր է մնում՝ հանուն խաղաղության ակտիվ գործողությունների փոխարեն»,- հայտարարել է Ուկրաինայի նախագահը։

Եվս մեկ այլ երկիր, որը, Զելենսկու խոսքով, կարող է Ռուսաստանին դրդել դադարեցնել պատերազմը, Միացյալ Նահանգներն է։ «Մոսկվան վախենում է Ամերիկայից և միշտ ուշադրություն է դարձնում նրա վրա»,- ասել է Ուկրաինայի նախագահը՝ հիշատակելով ԱՄՆ նախագահ Դոնալդ Թրամփի հետ նույն օրը ավելի վաղ ունեցած իր հանդիպումը։

Զելենսկին նաև կրկին հայտարարել է, որ Ռուսաստանի նախագահ Վլադիմիր Պուտինն անձամբ վախենում է ուղիղ խաղաղության բանակցություններ վարելուց։

«Այդ մարդը վախենում է դեմ առ դեմ նստել Ուկրաինայի և աշխարհի հետ և բացահայտ խոստովանել, որ ինքը միայն պատերազմ է ուզում։ Փոխարենը Պուտինը ուղարկում է պատվիրակների, որոնք  չեն կարող են և չեն ուզում դադարեցնել արյունահեղությունը»,- ասել է Զելենսկին։