Եվրոպական հանձնաժողովը ընդունել է Ռուսաստանի դեմ նոր պատժամիջոցների փաթեթ՝ Ուկրաինա լայնածավալ ներխուժման պատճառով, հայտնել է հանձնաժողովի մամուլի քարտուղար Պաուլա Պինյոն։  Պատժամիջոցների փաթեթը կլինի թվով 19-րդը։

Առայժմ հայտնի չէ, թե ինչ միջոցներ են ներառված փաթեթում։ The Guardian-ի փոխանցմամբ՝ Եվրոպական հանձնաժողովի նախագահ Ուրսուլա ֆոն դեր Լյայենը և ԵՄ արտաքին քաղաքական գերատեսչության ղեկավար Կայա Կալլասը պատժամիջոցների մանրամասները կներկայացնեն այսօր ավելի ուշ։

Politico-ն ավելի վաղ հայտնել էր, որ ԵՄ-ն մտադիր է նոր պատժամիջոցների փաթեթը ներկայացնել սեպտեմբերի 17-ին, սակայն հետաձգել էր դրա հրապարակումը։

Փաթեթի պատրաստման ընթացքում հաղորդվել է, որ ԵՄ-ն դրանում կարող է սահմանափակումներ ներառել բանկերի և էներգետիկ ընկերությունների նկատմամբ։ Բացի դրանից, իտալական ANSA գործակալությունը հայտնել է, որ Եվրոպան քննարկում է վիզային ռեժիմի խստացումը ռուսների համար։