ԱՄՆ նախագահ Դոնալդ Թրամփը հայտարարել է Իրանի հետ Իսլամական
Հանրապետության միջուկային ծրագրի շուրջ ուղիղ բանակցություններ սկսելու մասին։
«Մենք ուղիղ բանակցություններ ունենք Իրանի հետ, և դրանք արդեն սկսվել են: Դրանք տեղի կունենան շաբաթ օրը: Մենք մեծ հանդիպում կունենանք և կտեսնենք, թե ինչ կարող է լինել», - ասել է Թրամփը Սպիտակ տան Օվալաձև կաբինետում Իսրայելի վարչապետ Բենիամին Նեթանյահուի հետ հանդիպումից հետո: Այս մասին տեղեկացնում է Reuters-ը:
Թրամփի խոսքով՝ Իրանի հետ բանակցությունները «կանցկացվեն շատ
բարձր մակարդակով», սակայն այլ մանրամասներ նա չի հայտնել։ «Կարծում եմ՝ բոլորն էլ
համաձայն են, որ գործարքը ավելի նախընտրելի է, քան ակնհայտը»,- հավելել է նա։
Թրամփը նաև հայտարարել է, որ «եթե բանակցությունները հաջողությամբ չպսակվեն», Իրանի
համար «կսկսվի շատ վատ օր»։
Իրանական լրատվամիջոցների տեղեկություններով՝
բանակցությունները կանցկացնեն Իրանի արտաքին գործերի նախարար Աբաս Արաղչին և
Մերձավոր Արևելքի հարցերով ԱՄՆ նախագահի հատուկ ներկայացուցիչ Սթիվ Ուիթկոֆը՝
Օմանի արտգործնախարար Բադր ալ Բուսաիդիի միջնորդությամբ, հայտնում է Reuters-ը։
Ինքը՝ Արաղչին, Թրամփի ելույթից հետո պարզաբանել է, որ
«Իրանն ու ԱՄՆ-ը շաբաթ օրը՝ ապրիլի 12-ին, կհանդիպեն Օմանում՝ բարձր մակարդակով
անուղղակի բանակցությունների համար»։
