TikTok-ի ամերիկյան ակտիվների բաժանման գործարքը կասեցվել է այն բանից հետո, երբ Չինաստանն ազդարարել է, որ չի հաստատի գործարքը փոխադարձ մաքսատուրքերի մասին ԱՄՆ նախագահ Դոնալդ Թրամփի հայտարարությունից հետո, հայտնում է Reuters-ը՝ վկայակոչելով խնդրին ծանոթ աղբյուրների:
Գործարքը, որի կառուցվածքի քննարկումն, ըստ աղբյուրներից մեկի, հիմնականում ավարտվել էր չորեքշաբթի օրը, պետք է հանգեցներ ԱՄՆ-ում TikTok-ի գործառնությունների համար նոր ընկերության ստեղծման, որը գտնվում է Ամերիկայում և պատկանում է ամերիկացի ներդրողների մեծամասնությանը: Իսկ ByteDance-ը կունենար 20%-ից էլ պակաս մասնաբաժին:
Աղբյուրի վկայությամբ, գործարքն արժանացել էր գործող ներդրողների, նոր ներդրողների, ByteDance-ի և ԱՄՆ կառավարության հավանությանը։
ԱՄՆ նախագահ Դոնալդ Թրամփը ուրբաթ օրը 75 օրով երկարաձգել է չինական ByteDance տեխնոլոգիական ընկերության համար նախատեսված ժամկետը, որը պետք է հանրահայտ TikTok կարճ տեսանյութերի հավելվածի ամերիկյան ակտիվները վաճառեր ոչ չինացի գնորդին, հակառակ դեպքում կբախվեր արգելքի, որը պետք է ուժի մեջ մտներ հունվարին՝ համաձայն 2024 թվականի օրենքի:
«Գործարքը լրացուցիչ աշխատանք է պահանջում, որպեսզի ապահովի բոլոր անհրաժեշտ համաձայնեցումների ստորագրումը,- գրել է Թրամփը սոցցանցում՝ պարզաբանելով, թե ինչու է երկարաձգում հունվարին սահմանած վերջնաժամկետը։- Մենք հուսով ենք շարունակել բարեխիղճ համագործակցությունը Չինաստանի հետ, որը, ինչպես հասկանում եմ, այնքան էլ գոհ չէ մեր փոխադարձ սակագներից»:
