ԱՄՆ նախագահ Դոնալդ Թրամփը Ֆրանսիայի «Ազգային միավորում» կուսակցության խորհրդարանական խմբակցության ղեկավար Մարին Լը Պենի դատավճիռը որակել է որպես քաղաքական հետապնդման աղաղակող դեպք՝ այն համեմատելով վհուկների որսի հետ, և կոչ է արել անհապաղ ազատ արձակել նրան։ Նա իր կարծիքն է հայտնել Truth Social հարթակի հրապարակման մեջ։
«Վհուկների որս ընդդեմ Մարին Լը Պենի. ևս մեկ օրինակ այն բանի, թե ինչպես
են եվրոպական ձախերը օրենքն օգտագործում որպես զենք, որպեսզի լռեցնեն ազատ խոսքը և
գրաքննության ենթարկեն իրենց քաղաքական հակառակորդին, ընդ որում, այս անգամ բանը
հասել է ընդդիմախոսին բանտարկելուն»,- ասել է նա: Թրամփը հավելել է, որ ինքը
նախկինում բախվել է քաղաքական հաշվեհարդարի այդպիսի փորձերի։
«Ես անձամբ չեմ ճանաչում Մարին Լը Պենին, բայց հարգում եմ նրա ամրությունն ու
համառությունը, որով նա տարիներ շարունակ պաշտպանել է իր համոզմունքները: Նա անհաջողություններ
ունեցել է, բայց չի հանձնվել, և այժմ, հնարավոր հաղթանակի շեմին, փորձում են
կանգնեցնել նրան՝ օգտագործելով խղճուկ մեղադրանք, որի մասին նա, ամենայն
հավանականությամբ, չի էլ կասկածել. ինչ-որ սխալների պես մի բան ֆինանսական
փաստաթղթերում»,- նշել է ԱՄՆ նախագահը:
Թրամփը հավելել է, որ դա Ֆրանսիայի և նրա հրաշալի ժողովրդի ամոթն է, անկախ
նրանից՝ նրանք պաշտպանում են Լը Պենին, թե ոչ։ «Ազատություն
Մարին Լը Պենին»,- եզրափակել է
նա։
Հիշեցնենք, որ Փարիզի դատարանը Լը Պենին դատապարտել է 4 տարվա ազատազրկման
Եվրախորհրդարանի միջոցները մսխելու համար:
