ԱՄՆ Կոնգրեսի Ներկայացուցիչների պալատի 60
անդամներ երկկուսակցական կոչ են հղել ԱՄՆ պետքարտուղար Մարկո Ռուբիոյին՝ ամբողջությամբ
հետևել Ազատության աջակցության ակտի 907-րդ կետին՝ պահանջելով
անհապաղ դադարեցնել ԱՄՆ ռազմական օգնությունը Ադրբեջանին, և վկայակոչել են Բաքվի
կողմից Արցախի 120.000 քրիստոնյա հայերի էթնիկ զտումները, Հայաստանի ինքնիշխան տարածքի
շարունակվող օկուպացիան և հայ պահվող անձանց ապօրինի կալանավորումն ու նրանց
նկատմամբ դաժան վերաբերմունքը:
Վկայակոչելով Լեռնային Ղարաբաղի 120-հազարանոց
բնիկ հայ բնակչության նկատմամբ Ադրբեջանի կողմից իրականացված էթնիկ զտումը՝
օրենսդիրներն ընդգծել են, որ չբախվելով ոչ մի նյութական հետևանքների կամ
պատասխանատվության իրենց գործողությունների համար՝ Ադրբեջանը շարունակում է
խարխլել տարածաշրջանում արդարացի, կայուն և արժանապատիվ խաղաղություն ապահովելու
ջանքերը Հայաստանի դեմ իր շարունակվող ագրեսիայի միջոցով:
Օրենսդիրները պնդում են, որ Հայաստանի դեմ
Ադրբեջանի շարունակական ագրեսիայի, հայ ռազմագերիների նկատմամբ նրա շարունակական
դաժան վերաբերմունքի, հայկական քրիստոնեական մշակութային ժառանգության ոչնչացման և
Լեռնային Ղարաբաղում հայերի՝ իրենց տները անվտանգ վերադառնալու իրավունքի ժխտման
ֆոնին Ադրբեջանին պատասխանատվության ենթարկելու ցանկության շարունակվող
բացակայությունը ոչ միայն ռիսկի տակ է դնում Ադրբեջանի գործողությունների լեգիտիմացումը,
այլև ոգևորում է ԱՄՆ մրցակիցներին, որոնք ձգտում են օգտվել Վաշինգտոնի անգործությունից:
