Չնայած Ալիևը պարբերաբար խոսում
էր, որ բանակցությունները պետք է առանց միջնորդների լինեն, սակայն չմասնակցեց Բրիտանիայում
երկկողմ հանդիպմանը՝ պնդելով, որ դրան պետք է մասնակցի նաև Մեծ Բրիտանիայի վարչապետը։
Պատճառը, ըստ քաղաքագետ Դավիթ Ստեփանյանի, այն է, որ Բրիտանիան ցանկանում է լինել ոչ
թե միջնորդ, այլ ֆասիլիտատոր։ «Այդ հանդիպման ժամանակ չէին հիշատակվելու երեք հայտնի
սկզբունքները՝ կոմունիկացիաների ապաշրջափակումը, խաղաղության պայմանագիրը և դելիմիտացիա-դեմարկացիան,
որին պատրաստ չէր բրիտանական կողմը», - ասաց Ստեփանյանը։
Մարիա Զախարովայի՝ ռուսական հարթակում
հայ-ադրբեջանական բանակցությունների հարթակ տրամադրելու առաջարկը, որին Հաջիզադեի մակարդակով համաձայնել
է Ադրբեջանը, հայկական կողմը, ըստ քաղաքագետի, պետք է մերժի։ «Ադրբեջանը հարթակներ
փոխելով փորձում է ոչնչացնել բանակցային օրակարգը։ Այն օրակարգը, որն այսօր դրված է
սեղանին, և որը 90 տոկոսով համաձայնեցված է։ Ալիևը միջնորդենր փոխելով անընդհատ փորձում
է ստեղծել նոր հիմքեր բանակցությունների համար և փոխել բանակցային օրակարգը։ Եվ իհարկե
Ադրբեջանը համաձայն է, որ բանակցային օրակարգը Ռուսաստան վերադառնա։ Այդ դեպքում մենք
չենք ունենալու ո՛չ միջնորդ, ո՛չ ֆասիլիտատոր։ Մենք ունենալու ենք երեք կողմ, երբ երկու՝
ադրբեջանական և ռուսական կողմերի դիրքորոշումները նույնական են, և հայկականը լրիվ առանձին
է։ Մեզ համար սա անընդունելի է», - ասաց Դավիթ
Ստեփանյանը։
Cop29 համաժողովին Հայաստանը պետք է մասնակցի, եթե այնտեղ
քննարկվի և որոշվի ոչ միայն գերիների ազատման հարցը, այլև ստորագրվի խաղաղության պայմանագիրը,
որը, ինչպես նշել էր Ալիևը, 90 տոկոսով համաձայնեցված է։ Հակառակ դեպքում Բաքու գնալն
անիմաստ է։ «Cop29-ը պետք է օգտագործենք բոլոր հնարավոր հարթակներում և ձևաչափերում։
Պետք է հիմա գրավոր առաջարկ հնչեցնենք Բաքվին՝ խաղաղության պայմանագիր ստորագրելու
վերաբերյալ, ինչը պետք է հանրայնացվի։ Պետք է հայտարարենք, որ պատրաստ ենք գնալ Բաքու
և ստորագրել դա՝ առանց նախապայմանի։ Եթե Ադրբեջանը չհամաձայնի, մենք կունենանք հիմք՝
Բաքու չգնալու։ Հակառակ դեպքում Ադրբեջանը մեզ մեղադրելու է խաղաղություն չուզելու
մեջ։ Այսինքն՝ հերթական անգամ խնդիրը հիվանդ գլխից տեղափոխելու է առողջ գլխի վրա։ Ինչ
վերաբերում է Օկամպոյի առաջարկին, ապա, այո՛, եթե Ադրբեջանը մերժի, ապա պետք է աշխատել
Cop29-ի դեմ։ Որքանով հասկանում եմ, Ֆրանսիան վետոյի իրավունք ունի։ Եթե Ադրբեջանը
պատրաստ չէ խաղաղության օրակարգին, եթե Ադրբեջանը Cop29-ը օգտագործում է մեր դեմ, մենք
էլ պետք է աշխատենք Ֆրանսիայի հետ ու թույլ չտանք, որ այդ միջոցառումը ընդհանրապես
տեղի ունենա»,- եզրափակեց Դավիթ Ստեփանյանը։
Մանրամասն՝ տեսանյութում
Վովա Հակոբյան
